د فرانسې ولسمشر د امنیت شورا له غړیو سره د ایران په تړاو غږیږي
د فرانسې ولسمشر ایمانویل مکرون وایي، د ایران پر اټومي تاسیساتو د امریکا د متحد ایالتونو بریدونه په رښتیا سره اغیزمن و، خو تر ټولو بد حالت به دا وي چې تهران اوس د اټومي وسلو د نه پراختیا له نړیوال تړون څخه ووځي.
ښاغلي مکرون په بروکسل کې د اروپایي ټولنې له سرمشریزې وروسته له خبریالانو سره د خبرو پرمهال دا اندیښنه شریکه کړه.
هغه وویل چې د دې تړون د ساتلو هڅه به وکړي او په راتلونکو ورځو کې به د ملګرو ملتو د امنیت شورا له پنځو دایمي غړیو سره په دې تړاو خبرې وکړي.
د فرانس پریس اژانس د راپور له مخې دا خبرې وار له مخه لا پيل شو دي، د پنجشنبې په ورځ ایمانویل مکرون د امریکا د متحد ایالتونو له ولسمشر سره د ټیلفوني مکالمې پرمهال دا اندیښنه شرکه کړه. مکرون ولسمشر ټرمپ ته د هغو خبرو په اړه هم معلومات ورکړل چې په وروستیو ورځو او ساعتونو کې یې له تهران سره کړې وې.
د فرانسې ولسمشر بیا وویل، چې هیله یې دا ده چې نظریات سره همغږه شي او هدف دا وي چې ایران بیا د اټومي وسلو د جوړیدو هڅې ونه کړي.
ایران په ۱۹۷۰ کال کې د اټومي وسلو د نه خپریدو تړون (NPT) لاسلیک کړی او ژمنه یې کړې ده چې کله د اټومي انرژۍ په برخه کې هڅې کوي دا هڅې به د اټومي انرژۍ له نړیوالې ادارې سره شریکوي.
په دې وروستیو کې داسې ښکارې چې ایران له دې تړون څخه د وتلو زمینه برابروي. تهران د اټومي انرژۍ نړیواله اداره تورنه کړې ده چې د جګړې پرمهال یې د اسراییل ملاتړ کړی دی.
د امریکا پوځ د سرطان په لومړۍ ورځ په B-2 جنګي الوتکو او توماهاک توغندیو د ایران په فوردو، نطنز او اصفهان اټومي تاسیساتو بمباري وکړه. تر دې برید وروسته د امریکا ولسمشر ډونالډ ټرمپ وویل چې دا تاسیسات "په بشپړه توګه " ویجاړ شوي دي.
خو یوشمیر امریکایي رسنیو وروسته د امریکا د استخباراتو لومړنۍ ارزونه خپره کړه چې ویلي یې وو چې دې بریدونو یوازې د ایران اټومي پروګرام د میاشتو لپاره شاته غورځولی، دا راپورونه د امریکا دفاع وزارت په کلکه رد کړې دي او د امریکا دفاع وزیر پیټ هیګسیت دا راپور ابتدایي او کم باوره وباله.
دغه استخباراتي راپور د امریکا د متحد ایالتونو ولسمشر ډونالډ ټرمپ هم غندلی دی، دوی دواړو مشرانو، ټرمپ او هیګیسټ د چهارشنبې په ورځ په هاګ کې د ناټو د سرمشریزې په څنډه کې خبریالانو ته د ایران د درې اټومي مرکزونو د تخریباتو په اړه معلومات ورکړل. ولسمشر ټرمپ وویل، دې بریدونو د ایران اټومي پروګرام تر څو لسیزو پورې شاته غورځولی دی.