Ўзбекистон ва Тожикистон ўртасида 20 йиллик ток шартномаси

Ўзбекистон Роғун ГЭС орқали Тожикистондан электр энергиясини харид қилишни режалаштирмоқда, деб Kursiv.media хабар берди. Тожикистон ҳукумати Тошкент билан электр етказиб бериш бўйича келишув лойиҳасини маъқуллади. Ҳужжат матни Adlia сайтида эълон қилинган.

Электр энергияси учун тўлов “Ўзэнергосотиш” компанияси томонидан амалга оширилади. Бир киловатт/соат учун нарх ҚҚС билан 3,4 АҚШ сентни ташкил этади. Иккинчи йилдан бошлаб нарх ҳар йили 1% га оширилади.

Шунингдек, Тожикистоннинг “Барқи Точик” энергетика компанияси ҳам Ўзбекистонга қўшимча электр етказиб беришни режалаштирмоқда.

Тошкент ва Душанбе ўртасидаги ушбу келишув 20 йил давом этади ва кейинчалик яна 10 йиллик муддатларга узайтирилиши мумкин. Спорли ҳолатлар эса музокаралар ва маслаҳатлар орқали ҳал этилади.

Роғун ГЭС — Тожикистондаги энг йирик гидроэлектростанция бўлиб, Вахш дарёсида қурилмоқда. Унинг ўрнатилган қуввати 3,6 минг мегаваттни ташкил этади. 2018 йилда биринчи, 2019 йилда иккинчи агрегат ишга туширилган.

2024 йил давомида Тожикистон 2,7 миллиард кВт/соат электр энергиясини хорижга экспорт қилган (7,8% камайиш). Асосий харидорлар орасида Афғонистон, Ўзбекистон ва Қирғизистон бор. Ўзбекистон ўтган йили электр энергияси учун 18,4 миллион доллар тўлаган.