Ашурматовнинг “Истиқлол”даги дебюти кечикади: жароҳат тасдиқланди

Ўзбекистон миллий терма жамоаси марказий ҳимоячиси Рустам Ашурматов яқинда Эроннинг машҳур клубларидан бири — “Истиқлол”га ўтгани ҳақида футбол мухлисларига маълум бўлганди. Мазкур трансфер кўпчиликда қизиқиш уйғотгани аниқ, чунки футболчимизга клуб раҳбарияти ва мураббийлар штаби катта умид боғлаган эди, деб хабар берди varzesh3.com.

Бироқ, футболда ҳар доим ҳам барчаси режага кўра кетавермайди. Кеча Туркиядаги йиғин давомида “Истиқлол”нинг янги аъзоси Рустам Ашурматов машғулот пайтида жиддий жароҳат олди. У ўнг тиззасидан оғриқ ҳис қилиб, шифокорлар кўмагида машғулотни ярим йўлда тўхтатишга мажбур бўлди.

Маълумотларга кўра, жароҳатдан сўнг футболчи шошилинч равишда шифохонага олиб кетилган ва у ерда дастлабки тиббий текширувлардан ўтказилган. “Истиқлол” клуби шифокори ушбу ҳолат юзасидан расмий баёнот берди:

"Пайшанба кунги машғулот давомида Рустам Ашурматовнинг ўнг тиззаси шикастланди. Унинг жароҳат даражасини аниқлаш ва аниқ хулоса бериш учун МРТ текшируви ўтказдик. Илк натижаларга кўра, Рустам камида олти ҳафта майдондан ташқарида қолади. Унинг тўлиқ тузалиши ва машғулотларга қайта қўшилиши шу муддатга боғлиқ бўлади", — деди клуб шифокори.

Бу янгилик “Истиқлол” мухлислари учун қувончли бўлмади. Боиси, Ашурматовнинг жамоага қўшилиши орқали ҳимоя чизиғида кучли рақобат ва янги тактик ечимлар кутилганди. Эндиликда эса клуб раҳбарияти футболчининг соғлиғини тиклашга эътибор қаратишига тўғри келади.

Шу билан бирга, Ашурматов учун ҳам бу албатта синов даври. Унинг барқарор фаолиятида шундай узилишлар кам учраган бўлса-да, бундай жароҳатлар профессионал спортда тез-тез рўй бериши маълум. Мураббийлар штаби ва шифокорлар назоратидаги тикланиш жараёнидан кейин Рустам яна юқори савиядаги футболга қайтишига ишонч билдирилмоқда.

Тез орадаги тузалиш ва майдонга қайтиш тилаб қоламиз, Рустам! Мухлислар сендан янада кучлироқ қайта қайтишни кутмоқда.