Коммуналь хезмәтләргә түләү өчен 30-50 процентлык ташламаны кемнәргә бирәчәкләре билгеле

Күп балалы гаиләләр торак-коммуналь хезмәтләргә түләгәндә 30-50 процентлык ташламадан файдаланырга хокуклы. Бу ташламаны кем һәм ничек алырга мөмкинлеге турында Россия Финанс министрлыгының «Моифинансы.рф» фәнни-тикшеренү финанс институты проекты эксперты Любовь Хрустова «Прайм» агентлыгына сөйләде. Бу хакта РИА Новости агентлыгы хәбәр итә.

Ул искәртеп үткәнчә, бу ташламаны алу өчен критерийлар төбәкләрдә билгеләнә һәм алар сизелерлек аерылырга мөмкин. Күпчелек ташламалар өлкән балаларга 18 яшьлек тулган вакытка кадәр генә исәпләнә.

Ташламаларның күләме һәм конкрет шартлары шулай ук һәр төбәктә төрле. Федераль кануннар минималь күләмне -түләү суммасының 30 процентын гына билгели. Әмма кайбер төбәкләрдә ташламалар 50 процентка да җитәргә мөмкин.

«Субсидия күләменә гаиләдәге балалар саны, аның гомуми кереме, төбәктә яшәү минимумы дәрәҗәсе, торак-коммуналь хезмәтләр бәясенең төбәк стандарты, шулай ук төбәктә коммуналь түләүләргә максималь рөхсәт ителгән чыгымнар күләме һәм торак мәйданы нормасының төбәк стандарты йогынты ясарга мөмкин», - дип аңлатты финансист.

Кайбер төбәкләр күп балалы гаиләләргә өстәмә ташламалар (мәсәлән, капиталь ремонт өчен түләүгә) бирә. Хрустова сүзләренчә, торак-коммуналь хуҗалык хезмәтләренә түләү өчен ташлама субсидия рәвешендә бирелә - сумманың бер өлеше түләүченең счетына кире кайтарыла. Әгәр аның торак-коммуналь хезмәтләр өчен түләүдә бурычлары җыелган булса, компенсация бирелми.