Рэшфорд “Барса”да? Каталонияликлар битимни якунлаш арафасида
Маълумотларга кўра, каталонияликлар мураббийлар штаби футболчининг трансферига ижобий муносабат билдирган ва ҳозирда музокаралар сўнгги босқичга кирган. Бу ўйинчининг янги мавсумда Ла Лигада тўп суриш эҳтимолини янада кучайтирмоқда.
Шунингдек, аввалроқ тарқалган хабарларда “Барселона” клуби Рэшфорднинг “МЮ”даги ойлик маошини тўлиқ қоплай олмаслиги таъкидланган эди. Британиялик футболчи ҳозирги пайтда ҳафтасига 300 минг фунт маош олади. Бироқ у Испания гранди сафида тўп суриш имкони пайдо бўлгани сабабли, ўз маошини анча миқдорда камайтиришга рози бўлгани айтилмоқда. Бу эса унинг “Барса”га қўшилиш истагини қанчалик жиддий эканини кўрсатади.
Маркус Рэшфорд сўнгги мавсумларда “Манчестер Юнайтед” таркибида бир қанча муваффақиятли ўйинлар ўтказган бўлиб, ўзининг тезлиги, дриблинги ва голли вазиятлар яратишдаги маҳорати билан футбол жамоатчилигининг эътиборини тортган. Шу боис, “Барселона”нинг унга қизиқиши мутлақо тасодифий эмас.
Каталония клуби сўнгги йилларда молиявий қийинчиликлар сабабли трансферларда эҳтиёткор бўлиб келаётган эди. Бироқ клуб раҳбарияти Рэшфорднинг потенциали ва унинг жамоага қўшадиган қийматини инобатга олган ҳолда, бу битимга жиддий ёндашмоқда. Унинг фаолиятини Примерада давом эттириши “Барселона”нинг ҳужумдаги имкониятларини янада кенгайтиради.
Айни пайтда, клуб ва футболчи ўртасидаги келишув шартлари ишлаб чиқилмоқда ва яқин кунларда расман эълон қилиниши кутилмоқда. Агар битим амалга ошса, бу “Барса”нинг ёзги трансфер ойнасидаги энг шов-шувли трансферларидан бирига айланиши мумкин.
Футбол жамоатчилиги эса бу жараённи қизиқиш билан кузатмоқда. Чунки Маркус каби иқтидорли ва ёш футболчининг Ла Лигада тўп суриши нафақат “Барса”, балки Испания чемпионати учун ҳам катта ютуқ бўлади.