Мақомот: Мадина Ҳалимова аз "рашк" фарзандонашро ба дарё андохт
Мақомот дар Фархор мегӯянд, ки Мадина Ҳалимова аз сабаби "рашк", фарзандони худро ба дарё андохтааст. Ҳодиса ҳудуди 25 рӯз пеш рух дода буд.
Хуршед Раҳмонзода, муовини додситони ноҳияи Фархор, рӯзи 22 июл зимни нишасти хабарӣ гуфт, "омили ба дарё партофтанаш рашк будааст ва ҳоло худаш дар боздошт аст ва тафтишот идома дорад".
Додситон дар посух ба суоли хабарнигорон гуфт, ҳоло танҳо нисбати худи Мадина Ҳалимова парванда боз шудааст.
Мақомот дар бораи ин қазия бинобар идомаи тафтишот, маълумоти бештар намедиҳанд.
Шаби 29 ба 30-уми июн Мадина Ҳалимова, модари 27-солаи чаҳор тифли хурдсол, ки хурдӣ семоҳа ва бузургӣ 5-сола буд, чаҳор фарзанд ва худашро зоҳиран бо қасди худкушӣ ба рӯдхонаи Сурхоб андохт.
Чаҳор фарзандаш ғарқ шуда ҷон додаанд, вале худаш зинда монд. Ӯро бо иттиҳоми қатли кӯдаконаш боздошт карданд. Ҷасади се тифлашро пайдо кардаанд, ҷустӯҷуи яке дигар идома дорад.
Баъди фоҷиа ҳадсу гумон зиёд буд, шуд, ки Мадина Ҳалимова, гӯё аз рашк ба ҳамсар ва ба сабаби ҷанҷолҳои хонаводагӣ ба чунин кор даст задааст, вале хонаводаи Қудратулло Шарифов, ҳамсари Мадина Ҳалимова дар суҳбати катбӣ бо Радиои Озодӣ, фарзияи "баҳси хонаводагӣ ва доштани зани дуюм"-ро рад кард.
Онҳо гуфтанд, ки Мадина Ҳалимова мушкилоти равонӣ доштааст ва ӯро мунтазам барои "табобату дуохонӣ" мебурданд ва дар гузашта ҳам як бародараш даст ба худкушӣ зада будааст.
Ин ҳодиса дар ҷомеаи Тоҷикистон сару садоҳоеро ба миён овард.
Идораи Омбудсмен ва ё ваколатдори ҳуқуқи инсон дар Тоҷикистон аз марги ин чор кӯдаки хурдсол, ки модарашон онҳоро ба рӯдхона андохт, изҳори нигаронии амиқ кард ва аз ҷомеа ва мақомот хост, барои муҳофизати кӯдакон тадбирҳои бештар биандешанд.
Дар Тоҷикистон дар гузашта ҳам талоши худкушии модар ва бо худ ба рӯдхона андохтани фарзандонашон рух дода буд. Соли 2021 Шаҳло Шарифоваи 31-сола аз ноҳияи Панҷакент аввал се кӯдакаш -- Муҳаммадҷони 6-сола, Шаҳнозаи 4-сола ва Аминаи 8-моҳаро ба дор овехта кушт ва сипас худашро.
Соли 2016 Зӯҳро Маҳмуродоваи 25-сола аз Норак худ ва чаҳор фарзандашро ба дарёи Вахш андохт, ки дар натиҷа ҳама ба ҳалокат расиданд.
Дар ноҳияи Вахш ҳам як модари ҷавон ҳамроҳ бо се тифли хурдсолаш кӯшиши худкушӣ карда, боиси ҳалокати се кӯдакаш шуд.
Ба гуфтаи мақомот, сабаби аксари ин фоҷиаҳо хушунати хонаводагӣ будааст.