Aktiwist Myrat Düşemowyň kazyýet diňlenişigi “iýulyň aýagynda” geçiriler
Türkmenistanda tussaglykda saklanýan aktiwist Myrat Düşemowyň täze jenaýat işi boýunça sud diňlenişigi iýulyň aýagynda geçiriler. Bu barada işi alyp barýan sülçi Düşemowyň ejesine mälim etdi diýip, turkmen.news neşiri ýazýar.
15-nji iýulda Täzegül Mammedowa nobatdaky gezek ogluny görmek üçin Türkmenabada geldi. Düşemow häzir Türkmenabatdaky LB-D/9 (“Abdy Şükür”) türmesiniň deslapky tussaghanasynda saklanýar. Emma ejä tussaglykdaky ogluny görmäge rugsat berilmedi.
Maglumata görä, Düşemowyň işine seredýän sülçi kazyýet diňlenişiginiň “10-15 günden boljakdygyny” belläp, anyk senäni aýtmandyr.
Myrat Duşemow 2021-nji ýylyň 16-njy awgustynda sud edilip, adamy talamakda we bedenine ortaça agyrlykdaky zeper ýetirmekde günäli tapyldy we dört ýyl türme tussaglygyna höküm edildi. Adam hukuklaryny goraýjy halkara guramalar Duşemowa garşy bildirilen aýyplamalary syýasy matlaply atlandyryp, onuň raýat pozisiýasyny açyk beýan edendigi, kanuny haklaryny, adam hukuklaryny talap edendigi üçin toslanyp tapylandygyna ynanýarlar.
Düşemow tussaglygy LB-E/12 koloniýasynda geçirdi. Onuň tussaglyk möhleti 14-nji iýunda dolsa-da, ol öýüne dolanmady.
Turkmen.news neşiriniň habaryna görä, oňa boşadylmagynyň öňýany prowokasiýa gurnalyp, ony täze aýyplamalar esasynda saklapdyrlar. Azatlyga çykmazyndan ozal bir tussag oňa garşy şikaýat edipdir.
Düýbi ABŞ-da ýerleşýän "Human Rights Watch" (HRW) guramasy türmede oturan aktiwistiň täze şübheli aýyplamalara sezewar edilendigini belläp, türkmen häkimiýetlerinden Myrat Duşemowy derrew we şertsiz boşatmagy, şeýle-de onuň tussaglygyny uzaltmak üçin edilýän kemsidiji tagallalardan el çekmegi talap etdi.