Садыр Жапаров Жер кодексин өзгөртүү мыйзамына кол койду

Президент Садыр Жапаров 21-июлда Жер кодексине өзгөртүү киргизүү мыйзам долбооруна кол койду. Документти Жогорку Кеңеш 4-июнда эч талкуусуз кабыл алган.
Садыр Жапаров бул мыйзамды апрелде каршы пикир менен артка кайтарган. Президенттин басма сөз катчысы Аскат Алагөзов "Мамлекет башчысы бул чечимин Кыргызстанда жеке менчик кол тийгис экендиги менен түшүндүрөт. Эгерде огород же турак жай турган жер мамлекеттик максатка зарыл болсо, анда анын ордуна компенсация төлөнүп же башка жерден тийиштүү жер тилкеси сунушталышы керектиги белгиленди", - деп билдирген.
Каршы пикир менен парламентке кайтып келгенден кийин макулдашуу тобу кайра иштеп чыкканы айтылган.
Министрлер кабинети 2022-жылы иштеп чыккан Жер кодексинин жаңы редакциясы бир жылдай коомдук талкууда жүрүп, 2023-жылы парламентке киргизилген.

Мыйзамга байланыштуу өлкөдө бир катар нааразылык акциялары өткөн. Айрым адамдар парламенттин алдына чогулуп, президентке кайрылган, парламент кабыл алган мыйзамга кол койбоону суранышкан.

Алар “бул мыйзамга президент кол койсо жер тилкелерин менчик ээлеринин макулдугусуз мажбурлап тартып алууга жол ачыларын” айтып, менчикке болгон кол тийбестик сакталышы керектигин билдиришкен.
Президент Садыр Жапаров жыл башында "Кабар" улуттук агенттигине курган маегинде менчик жерлерди алып коюуга каршы экенин жана жеке менчик мүлк кол тийгис экенин айткан. Ал жеке менчик жерлерди жергиликтүү бийлик текшерип турушу керектигин билдирип, жер ээлерин бир метр жерди да бош калтырбай иштетүүгө чакырган.

Кыргызстанда Жер кодекси 1999-жылы кабыл алынган. Андан бери ага 61 ирет өзгөртүү киргизилген. Бийлик өкүлдөрү буга карабай документ эскирип, бүгүнкү шарттарга жооп бере албай калганын белгилеп, аны толук жаңы редакцияда кабыл алууну сунушташкан.