Дания тарихдаги энг кучли квант компьютерини яратади
Дания дунёдаги энг кучли ва мукаммал квант компьютерини яратиш мақсадида йирик илмий ва технологик лойиҳани амалга оширишни бошлади, деб Бундле хабар берди. QuNorth деб номланган ташаббусда Microsoft ҳамда Калифорниядаги Атом Cомпутинг компаниялари ҳамкорлик қилади. Лойиҳа инновацион салоҳиятга эга бўлиб, унда дастурий ва аппарат қисмлар замонавий ечимлар асосида уйғунлаштирилади.
Дастурий таъминот учун Microsoft жавобгар — компания ўзининг Азуре Қуантум платформасини таклиф қилади. Аппарат қисмлари эса Атом Cомпутинг томонидан етказилади ва бу ерда “нейтрал атомлар” асосидаги илғор квант технологияси қўлланилади. Яратувчиларнинг айтишича, «Магне» номли янги тизим тахминан 50 та мантиқий ва 1200 дан ортиқ физик кубит билан ишлай олади.
Бугунги кунгача ҳеч бир компания бундай кўрсаткични бир тизимда жамлай олмаган. Шу жиҳати билан Магне дунёдаги энг мукаммал квант компьютерига айланиши мумкин.
Компьютер қурилиши 2025 йил кузида бошланади ва 2027 йилда фойдаланишга топширилиши режалаштирилган. Тизим Копенгаген шаҳрида ўрнатилади ва бутунлай 100 фоиз Данияга тегишли бўлади. Бу лойиҳа нафақат Дания, балки бутун Европа илм-фани учун муҳим босқич саналади.
Лойиҳа учун Дания экспорт-инвестиция жамғармаси (ЭИФО) ва дунёга машҳур Ново Нордиск жамғармаси томонидан 80 миллион евро (тахминан 10 миллиард 160 миллион сўм) маблағ ажратилган.
Мутасаддилар таъкидлайдики, Магне квант компьютери илм-фанда янги давр бошлашига сабаб бўлади ва келгусида тиббиёт, энергетика, сунъий интеллект, молия ва бошқа кўплаб соҳаларда инновацион ютуқларга асос бўлади. Яна бир муҳим жиҳат — ушбу технологиядан аввало Дания олимлари, компаниялари ва олий ўқув юртлари фойдаланади.
Мутахассислар бу лойиҳани Дания илмий-техник салоҳиятининг янги босқичи ва стратегик тараққиёти сифатида баҳоламоқда.