Суд секретаре ришвәт исәбенә мигрантка депортациядән котылырга ярдәм итәргә вәгъдә биргән
Татарстанда ришвәт хисабына мигрантка депортациядән котылырга ярдәм итәргә вәгъдә биргән суд секретаре суд каршына басачак.
Ачыкланганча, узган елның җәендә Татарстан судларының берсендә миграция кагыйдәләрен бозган чит ил кешесенең эшен тикшергәннәр. Закон буенча аны илдән чыгарып җибәрергә тиеш булганнар, ләкин суд утырышы секретаре мигрантка булышырга вәгъдә биргән.
Арадашчылар аша ул аның эш бирүчесен эзләп тапкан һәм мәсьәләне акча ярдәмендә хәл итәргә тәкъдим иткән.
Ләкин секретарь акчаны үз кесәсенә салып куйган, ә чит ил кешесен барыбер депортацияләгәннәр.
Җинаять эше судка тапшырылган. Хәзер секретарьны 6 елга колониягә озатырга мөмкиннәр.