Тошкентда 12 ёшли бола ток уриши оқибатида ҳаётдан кўз юмди
Тошкент шаҳрида фожеали воқеа содир бўлди. Бектемир туманида 12 ёшли бола ток уриши оқибатида ҳаётдан кўз юмди. Гувоҳларнинг сўзларига кўра, бола сувга тегиб турган контейнерга суяниб турганида, кучли ток уришига дучор бўлган. Бирданига бақириқ овоз эшитилган, бола ерга пешонаси билан йиқилган ва шифохонага етиб бормасдан вафот этган.
Ҳодиса маҳаллада катта қайғуга сабаб бўлди. Онаси оғир ҳолда, қўшнилар эса бу каби ҳодисалар қайталанмаслигини исташмоқда. Аҳолининг айтишича, бола очиқ электр щитига кириб кетган ва у ерда ток уриши юз берган. Маҳалла аҳли электр щити доим очиқ ҳолда турганини таъкидлашади.
Ҳудуд электр тармоғи учун масъул "Eko Hudud BSK" иш бошқарувчиси Аҳрор Абдусаломов: "Ҳаво иссиқлигида тунда щитни очиб сув қўямиз, кундузи ёпиб қўямиз", деган. Аммо қўшнилар бу гапга ишонмаяпти. Улар щит ҳеч қачон ёпилмаганини, масъуллар эътиборсизлиги фожеага олиб келганини таъкидлашмоқда.
Ҳодиса бўйича махсус комиссия тергов бошлади. Электр хавфсизлиги ва назорат масалалари аҳоли ўртасида янада жиддий муҳокама қилинмоқда. Маҳаллада профилактика ишларини кучайтириш талаб этилмоқда. Боланинг ота-онаси бу каби ҳолатлар такрорланмаслиги учун барча масъуллар жавобгарликка тортилишини исташмоқда.