Адылбек Касымалиев Кыргызстан Алтайга үч ак илбирс бергенин айтты

Министрлер кабинетинин төрагасы Адылбек Касымалиев Кыргызстан Алтай Республикасы менен ак илбирсти сактоо жаатында кызматташып жатканын билдирди. Ал бул тууралуу аталган жумуриятта өткөн эл аралык экологиялык конференцияда билдирди.

"Март айында Алтайдын “Ак илбирс” борборуна үч ак илбирс берилген. Бул жөн гана символикалык акция эмес, Алтай-Саян аймагынын экосистемасынын туруктуулугуна кошкон салым. Жалпысынан 2019-жылдан бери эл аралык өнөктөштөр менен биологиялык ар түрдүүлүктү коргоо, экологиялык тропторду түзүүнү жана экспедицияларды жүргүзүүнү камтыган 10дон ашык биргелешкен долбоор ишке ашырылды. Кыргызстанда “Чаткал” жана “Ак илбирс” деген эки экологиялык коридор түзүлдү. Борбор Азиядагы биологиялык ар түрдүүлүктү сактоо максатында коңшу мамлекеттердин аймактарын камтыган трансчекаралык экологиялык коридорлорду түзүү мүмкүнчүлүгүн карап чыгууну сунуштайбыз",-деген Касымалиев.

Былтыр жыл аягында Бириккен Улуттар Уюмунун (БУУ) Башкы Ассамблеясынын резолюциясы менен 23-октябрь – Эл аралык ак илбирс күнү деп белгиленген.

Президент Садыр Жапаровдун басма сөз катчысы Аскат Алагөзов аталган уюм муну менен Кыргызстандын демилгесин колдоого алганын билдирген.

Президент Садыр Жапаров “Ак илбирсти Кыргызстандын улуттук символу деп таануу жөнүндө” жарлыкка 2023-жылы кол койгон.

Анын алдында бир катар эл аралык уюмдардын Бишкектеги өкүлчүлүктөрү ак илбирске улуттук жаныбар макамын ыйгаруу сунушу менен өлкө башчыларына кайрылган.

Расмий маалыматка караганда, Кыргызстанда болжол менен 330дай ак илбирс бар жана аны аткандарга эки миллион сом айып пул салынат.