Быел Татарстанда 2,4 миллион кешегә гриппка каршы прививка ясау планлаштырыла
Бу сезонда Татарстанда яшәүче 2 429 285 кешегә гриппка каршы прививка ясау ниятләнә, бу төбәк халкының 60 процентын тәшкил итә. Бу хакта «Татар-информ» да узган матбугат конференциясендә Роспотребнадзорның ТР буенча идарәсе җитәкчесе урынбасары Любовь Авдонина сөйләде.
«Бүген без вакцинациягә әзерлек эшләрен башлыйбыз. Традиция буенча ул сентябрьдә старт ала», - дип билгеләде Любовь Авдонина.
Ведомствода грипп йоктыру куркынычы зур булган төркемнәр турында искә төшерделәр. Болар:
- мәктәпкәчә яшьтәге балалар;
- мәктәп укучылары;
- студентлар;
- медицина хезмәткәрләре һәм мәгариф хезмәткәрләре;
- кошлар, дуңгызлар үрчетүчеләр, зоопарк хезмәткәрләре;
- кошлар һәм хайваннар үрчетү белән шөгыльләнүче кешеләр.