Әлмәттә II «КАРАКҮЗ ФИЛЬМ» кинофестивале уза
Әлмәттә 28 июльдән 3 августка кадәр II «КАРАКҮЗ ФИЛЬМ» тамашачылар мәхәббәте кинофестивале уза. Фестивальнең төп үзенчәлеге - профессиональ жюри булмавында. Хәлиткеч сүзне тамашачы әйтә: иң яхшы фильмнарны нәкъ менә ул билгели.
Фестиваль атналыгы кысаларында 12 илдән 40тан артык фильм күрсәтү ниятләнә. Программага тулы метражлы һәм кыска метражлы картиналар, шулай ук «КАРАКҮЗ ФИЛЬМ – балаларга» махсус блогы кертелгән. Оештыручылар премьераларга аерым игътибар бирә. Әлмәт тамашачысы беренче булып берьюлы өч яңа фильм карый алачак. Алар:
«Ближе к солнцу» - Владислав Линың Үзбәкстандагы тормышка багышланган документаль кыска метражлы фильмы;
«Иван Семенов. Первый поцелуй» - җитлегү һәм дуслык турында гаилә комедиясе. Фильмны продюсер һәм актер Антон Богданов тәкъдим итәчәк, 2 августта аның белән очрашу була;
«Чингис-хан» - тарихи нейромикс һәм ясалма фәһем ярдәмендә төшерелгән дөньяда беренче тулы метражлы фильм. Ул тамашачыны XIII гасырга алып китә, сугыш күренешләрен һәм образларны бирүдә төгәллеге белән аерылып тора. Аны 1 августта карарга мөмкин.