Андижонда ҳибсхона бошлиғи нима сабабдан ишдан олинди?
Андижон вилояти Избоскан тумани ИИБ Вақтинча сақлаш ҳибсхонасининг 6 нафар ходимига нисбатан интизомий чоралар қўлланди.
Олий Мажлиснинг Инсон ҳуқуқлари бўйича вакили (Омбудсман) матбуот хизматининг маълум қилишича, мазкур интизомий чора жорий йилнинг март ойида ушбу вақтинча сақлаш ҳибсхонаси (ВСҲ)даги шароитларни ўрганиш натижаларига кўра белгиланган.
Гап шундаки, ўрганишлар натижасида ҳибсхонада санитария-гигиена ва моддий-техник таъминотга оид жиддий камчиликлар, канализация тизими билан боғлиқ муаммолар борлиги ва айрим маҳбусларни мажбурий меҳнатга жалб қилиш ҳолатлари қайд этилган.
Омбудсман томонидан ушбу ҳолатлар бўйича Андижон вилояти Ички ишлар бошқармасига камчиликларни бартараф этиш ва шу каби ҳолатлар такрорланмаслиги учун тегишли чоралар кўрилишини сўради.
Омбудсманга маълум қилинишича, мониторинг якунларига кўра 6 нафар ходимга нисбатан хизмат текшируви тайинланган ва уларга интизомий чоралар қўлланилган. Жумладан, 1 нафар ходим Интизомий кенгаш муҳокамасига қўйилган, 2 нафар ходимга танбеҳ, 2 нафарига эса ҳайфсан интизомий жазолари берилган. ВСҲ раҳбари эса Ички ишлар органларидан ўз аризасига кўра бўшатилди.
«Ҳозирда аниқланган камчиликларни бартараф этиш бўйича ишлар бошланган бўлиб, уларнинг тўлиқ ҳал этилиши бўйича Олий Мажлиснинг Инсон ҳуқуқлари бўйича вакили (Омбудсман) доимий назоратини олиб боради», – дейилади хабарда.