"Марсель" юлдузи Саудияга кетади: мақсад – Роналду билан ўйнаш
Англия футболининг ёш ва иқтидорли вингери — Мэйсон Гринвуднинг келажаги атрофидаги муҳокамалар янги босқичга кўтарилди. Франциянинг "Марсель" клубидаги самарали ўйинлари орқали яна футбол олами марказига қайтган 23 ёшли футболчи энди Саудия Арабистони томон йўл олиши мумкин, деб хабар берди италиялик спорт журналисти Руди Галетти.
Галетти тарқатган маълумотларга кўра, Саудиянинг нуфузли жамоаси — "Ал Насср" раҳбарияти Гринвуд билан алоқага чиқиб, уни ўз таркибига қўшиб олиш ниятини билдирган. Эътиборлиси шундаки, Гринвуд бу таклифга ижобий муносабат билдирган. Сабаблардан бири сифатида эса у португалиялик дунё юлдузи Криштиану Роналду билан бир жамоада тўп суришни хоҳлаётгани қайд этилмоқда.
Мэйсон илгарироқ, 2021–2022 йилги мавсумда "Манчестер Юнайтед" сафида айнан Роналду билан бир майдонда бўлишган. Ўшандаги жамоавий муҳит ва юлдузлар орасидаги ўзаро ҳамжиҳатлик унда катта таассурот қолдирган бўлса, ажаб эмас.
Бироқ бу трансфер осон кечмаслиги мумкин. "Ал Насср" клубининг бу ёздаги трансфер харажатлари учун ажратилган бюджети чекланганлиги маълум қилинган. Бу эса, клубнинг мураббийлар штаби томонидан тақдим этилган истакларни тўлиқ амалга оширишга етарли эмаслигини англатади. Шу сабабли Гринвуднинг ҳаракати молиявий тўсиқларга дуч келиши мумкин.
Шу билан бирга, Гринвуднинг "Марсель"даги статистикаси унинг трансферга арзишини исботлайди. У 2024/25 йилги мавсумда Франция чемпионатида 34 учрашувда иштирок этиб, 21 та гол урган ва 5 та ҳал қилувчи пас билан жамоасига катта ҳисса қўшган. Бу натижалар уни жамоа етакчи тўпурарига айлантирди.
Томошабинлар учун қизиқарлиси — ушбу эҳтимолий трансфер фақат спорт нуқтаи назаридан эмас, балки маркетинг ва мухлислар эътиборини жалб қилиш нуқтаи назаридан ҳам катта воқеа бўлиши мумкин. Гринвуднинг Саудия чемпионатига йўл олиши, айниқса Роналду билан тандемда ўйнаши футбол оламида янги мавзуга айланиши турган гап.
Энди футбол олами навбатдаги расмий баёнотларни кутмоқда. Гринвуд "Ал Насср" сафида кўринадими? Йўқми? Бу саволга яқин кунларда аниқ жавоб топилади. Аммо аниқ бир нарса бор — бу ёш юлдузнинг ҳар бир қадами футбол мухлислари диққат марказида қолаверади.