Автомобил ойналарини қорайтириш арзонлашиши мумкин
Ёзнинг иссиқ кунларида машина ичидаги ҳароратни пасайтириш ва қуёш нурларидан ҳимоя қилиш мақсадида ойналарни қорайтириш амалиёти кўпчилик ҳайдовчилар учун долзарб масалага айланди.
Ички ишлар вазирлиги ташаббуси билан янги, имтиёзли тартиб жорий этилиши мумкинлиги ҳақида хабарлар тарқалди.
Мазкур таклифга кўра, M1 тоифасига мансуб транспорт воситалари (яъни йўловчи ташувчи автомобильлар) учун ойна қопламаларини қорайтиришга рухсатнома бериш нархи ёз фаслида — 1 майдан 31 августгача — анча арзонлашиши мумкин.
Ҳозирда ойна қорайтириш учун жисмоний ва юридик шахслар 412 минг сўм тўлашлари талаб этилади. Янги таклифга асосан, бу миқдор бир бараварлик (БРВ)гача — яъни 340 минг сўм атрофига туширилиши кўзда тутилмоқда.
Хорижий юридик шахслар учун эса ҳозирги 2 060 000 сўмлик тариф 5 БРВгача (1 700 000 сўм) камайтирилиши мумкин.
Ички ишлар вазирлигига кўра, бундай енгилликлар ҳайдовчиларга қулайлик яратиш билан бирга, расмий ва қонуний равишда ойна қопламаларини қорайтириш фаолиятини кенгайтиришга хизмат қилади. Шу билан бирга, транспорт воситасида ҳаракатланиш пайтида хавфсизлик ва қулайликни таъминлашда ҳам ижобий таъсир кўрсатиши кутилмоқда.
Эслатиб ўтамиз, мазкур ўзгариш ҳозирча фақат муҳокама босқичида. Таклиф Норматив-ҳуқуқий ҳужжатлар муҳокамаси порталида жамоатчилик фикри учун эълон қилинган ва белгиланган муддат ичида таклиф ва мулоҳазалар асосида якуний қарор қабул қилинади.