Путин ва Трамп ХЖСдан қочиш учун Аляскани танлади
The Washington Post нашри ёзишича, Владимир Путин ва Доналд Трампнинг АҚШ ҳудудида, аниқроғи Аляска штатда учрашиши тасодиф эмас. Бу қарорнинг асосий сабаби — Аляска Халқаро жиноят суди (ХЖС) юрисдикциясига кирмаслигида.
Америка ОАВ хабарларига кўра, икки етакчи учрашуви олдидан бир нечта эҳтимолий жойлар кўриб чиқилган. Путиннинг ўзи омма олдида қилган баёнотида музокаралар Бирлашган Араб Амирликларида ўтиши мумкинлигини тилга олганди. Шу билан бирга, Италияда учрашув ўтказиш варианти ҳам муҳокама қилинган, аммо Россия раҳбарининг ХЖС ордери асосида қўлга олиниш хавфи сабабли бу таклифдан воз кечилган.
“АҚШ Халқаро жиноят судининг ҳуқуқий томони эмас, шунинг учун Аляскадаги учрашув ҳар қандай ҳуқуқий муаммолардан халос қилади”, — дея таъкидлаган WP.
Шунингдек, Алясканинг танланишига яна бир омил сифатида унинг Россия ҳудудига географик яқинлиги қайд этилмоқда. Путин маслаҳатчиси Юрий Ушаков буни юмор билан изоҳлаб: “Делегациямизга фақат Беринг бўғозидан учиб ўтиш кифоя, энг қулай йўл ҳам шу”, — деган.
Маълумот учун, Трамп ва Путиннинг тарихий деб баҳоланаётган учрашуви жорий йилнинг 15 августида Аляскада бўлиб ўтади. Бу ҳақда АҚШ президенти Доналд Трамп шахсан Truth Social ижтимоий тармоғидаги саҳифасида эълон қилган.
Экспертлар ва сиёсий кузатувчилар эса бу учрашувда қайси масалалар муҳокама қилиниши ва унинг глобал сиёсатга қандай таъсир кўрсатишини қизиқиш билан кутмоқда.