"Навбаҳор"да яна молиявий муаммолар: клубни жиддий чоралар кутяптими?
"Навбаҳор" футбол клуби атрофидаги вазият сўнгги ҳафталарда янада қизғин ва хавотирли тус олмоқда. Жамоа мухлисларини ташвишга солаётган асосий масала — ўзбекистонлик футболчилар олдидаги қарздорлик масаласи ҳалигача ҳал қилинмагани.
Ўзбекистон футболчилар уюшмаси раҳбари Камолиддин Мурзоевнинг маълум қилишича, бу муаммо сабаб ёзги трансферлар ойнаси "Навбаҳор" учун шартли равишда очилган эди. Яъни, клуб белгиланган муддатда, аниқроғи, 10 августгача қарзларини тўлашга кафолат берган. Агар ушбу маблағлар тўланмаса, рўйхатдан ўтган янги футболчиларнинг лицензиялари автоматик равишда қайтариб олинишига жамоа олдиндан рози бўлган.
— Бу фақат шартнома ёки ёзма мажбурият эмас, балки футбол қонун-қоидаларида белгиланган қатъий тартиб, — дейди Мурзоев. — Бугун футболчилар ўтиши ва мақоми қўмитасининг навбатдаги йиғилиши бўлиб ўтади. Унда "Навбаҳор" янги таркиби бўйича лицензия масаласи кўриб чиқилади. Агар қарздорлик бартараф этилмаса, лицензиялар бекор қилиниши билан бирга, кейинги босқичда очко олиб ташлаш масаласи ҳам кўрилиши мумкин.
Эслатиб ўтамиз, "Навбаҳор" бугун Суперлиганинг 18-турида "Бобур Арена"да "Андижон" жамоасига қарши баҳс олиб боради. Бироқ майдондаги беллашувдан кўра, клубнинг молиявий муҳити ва расмий қарорлар ҳақидаги хабарлар кўпроқ муҳокама қилинаётгани айни ҳақиқат.
Агар бу муаммо тез орада ҳал этилмаса, нафақат янги футболчиларнинг жамоада қолиши, балки клубнинг мавсумдаги умумий натижаларига ҳам жиддий таъсир кўрсатиши мумкин. Мухлислар эса бир савол билан яшаяпти: раҳбарият сўзда қолган ваъдасини амалий ишга айлантира оладими?