Зинедин Зидан Франция термаси бош мураббийлигига яқинлашаётгани айтилмоқда
Футбол оламининг энг нуфузли шахсларидан бири бўлган Зинедин Зидан 2021 йилда “Реал Мадрид” бош мураббийлиги лавозимидан кетганидан бери фаолиятдан бир муддат узоқлашган эди. Бироқ энди у яна ўзининг севимли ишига қайтиш имконияти остонасида турибди. Муқаддас тўп атрофидаги инсайдерлар ва нуфузли нашрлар франциялик афсона учун янги йўналиш аниқланаётганини хабар қилмоқда.
Ишончли манбалардан бири саналган Defensa Central'нинг ёзишича, Зидан 2026 йилги жаҳон чемпионати якунланганидан сўнг Франция миллий терма жамоаси бошқарувини қабул қилиши кутилмоқда. Бу дегани, у жамоани узоқ йиллар давомида муваффақиятли бошқариб келаётган Дидье Дешам ўрнини эгаллаши мумкин.
Ушбу хабарни янада мустаҳкамлаган маълумотни RMC Sport журналисти Жильбер Брисбуа ҳам тасдиқлади. Унинг айтишича, Зидан ҳақиқатан ҳам Франция термасига раҳбарлик қилишга асосий номзод сифатида кўрилаяпти.
Зиданнинг ўзи ҳам яқинда берган интервьюсида, шу кунгача ўзини тўлиқ футбол мураббийи сифатида ҳис қилаётганини ва муносиб таклифлар бўлса, яна иш бошлашга тайёрлигини таъкидлади. Бу сўзлар, албатта, француз футбол мухлислари орасида катта қизиқиш уйғотди.
Дидье Дешам эса, бу хабарга мутлақ хотиржам муносабат билдирди. Унинг сўзларига кўра, Зидан бош мураббий сифатида жуда муносиб танлов ҳисобланади:
— “Зизу – бу табиий ва ҳамма кутган вариант. Унинг тажрибаси ва обрўси Франция термаси учун катта плюс бўлади”, — деди Дешам.
Маълумки, Франция терма жамоасини бошқариш Зинедин Зиданнинг энг катта орзуси ҳисобланади. Шу сабабли у ҳар йили турли йирик клублардан оладиган таклифларни рад этиб келмоқда. Унинг кўзлаган асосий мақсади — миллий жамоани юқори чўққиларга олиб чиқиш ва яна бир бор француз футболи тарихида ёрқин саҳифа очиш.
Агар ушбу режа амалга ошса, Франция термаси янги даврга қадам қўйиши ва Зидан раҳбарлигида янада юқори мақсадлар сари интилиши эҳтимолдан холи эмас.