Arrestohet një person, pranon fajësinë për vrasjen në Baicë

Autoritetet e drejtësisë në Kosovë njoftuan se një person është arrestuar dhe i njëjti ka pranuar fajësinë për vrasjen e Enver Bajraktarit në Baicë të Lipjanit.

T.K., u arrestua të martën, pas kontrolleve të kryera në fshatin ku ndodhi edhe vrasja.

“Pas ndalimit në Polici dhe dhënies së deklaratës, i dyshuari ka pranuar veprimet e tij dhe kryerjen e veprës penale”, u tha në njoftimin e përbashkët të Prokurorisë Themelore në Prishtinë dhe Policisë së Kosovës.

Autoritetet drejtësisë thanë se T.K. është ndaluar dhe “ndaj tij janë duke u zhvilluar procedurat e mëtutjeshme ligjore”.

Prokuroria dhe Policia shtuan se po vazhdojnë të ndërmarrin të gjitha veprimet për të zbardhur të gjitha rrethanat e këtij rasti.

Më 4 gusht, Bajraktari ishte raportuar i zhdukur nga familjarët e tij. Një ditë më vonë, në Baicë ishte gjetur një trup i pajetë i varrosur në një arë. Më pas u konfirmua se viktima ishte Enver Bajraktari.

Pas gjetjes së trupit, autoritetet kishin intervistuar katër dëshmitarë.

Prokuroria dhe Policia thanë se pas arrestimit të T.K., po vazhdojnë të ndërmarrin të gjitha veprimet për të zbardhur të gjitha rrethanat e këtij rasti.