Бўка йўлида ҳаракатдаги Matiz мотор қисми ёниб кетди
Тошкент вилоятининг Бўка туманида йўл ҳаракати пайтида Matiz русумли енгил автомобилда ёнғин чиқди. Вилоят Йўл ҳаракати хавфсизлиги бошқармаси маълумотига кўра, ҳодиса 15 август куни тахминан соат 12:00 атрофида D020 “Қорасув – Бўка – Бекобод шаҳар” автомобиль йўлининг 35-километрида рўй берган.
Маълумотларга кўра, 1992 йилда туғилган ҳайдовчи бошқарувидаги Matiz йўлда ҳаракатланаётган вақтда автомобилнинг двигатель қисмида қисқа туташув содир бўлиб, ёнғин келиб чиққан. Оқибатда салоннинг олд қисми ва муҳаррик соҳаси қаттиқ зарар кўрган.
Йўл ҳаракати хавфсизлиги хизматининг таъкидлашича, ҳодиса натижасида ҳайдовчи ёки йўловчилар соғлиғига зарар етмаган. Воқеа жойига етган ёнғин-қутқарувчилар ёнғинни қисқа фурсат ичида тўлиқ ўчиришга муваффақ бўлишган.
Ҳозирда Бўка тумани Фавқулодда вазиятлар бўлими томонидан ёнғин сабабларини аниқлаш ва тўлиқ текширув ишлари олиб борилмоқда. Мутасаддилар ҳайдовчиларга автомобил техника ҳолатини мунтазам текшириш ва электр тизимидаги носозликларни ўз вақтида бартараф этишни тавсия этмоқда.