Рубежное шәһәренең 2нче мәктәбе реконструкциядән соң укучыларны кабул итәргә әзерләнә
ТР Рәисе Администрациясе җитәкчесенең беренче урынбасары һәм Территорияләр белән эшләү идарәсе башлыгы Илнур Гарипов җитәкчелегендәге Татарстан делегациясе Рубежное шәһәренең 2нче мәктәбендә булды, анда ремонт эшләре финал этабына керде. Татарстан подрядчысы көче белән үткәрелгән реконструкция эшләре нибары бер ел дәвам итте һәм учреждениенең барлык төп биналарын колачлады. Бу хакта «Бердәм Россия» партиясенең Татарстандагы төбәк бүлеге матбугат хезмәтендә хәбәр иттеләр.
Ремонт барышында уку бүлмәләре, спорт заллары, бинаның фасады, химия һәм биология буенча махсуслаштырылган сыйныфлар, шулай ук актлар залы яңартылган. Мәктәпнең төп холлы паннолар белән бизәлгән.
Илнур Гарипов искәрткәнчә, бер ел элек биредә «Мәктәпкә җыенырга ярдәм ит» акциясе узган, балаларга портфельләр һәм мәктәп кирәк-яраклары тапшырганнар. Ул билгеләп үткәнчә, узган ел мәктәп зур үзгәреш кичерде һәм хәзер яңа уку елына тулысынча әзер.
Аның сүзләренчә, учреждение Россиядә кабул ителгән югары стандартларга туры килә һәм Татарстанның иң яхшы мәктәпләреннән калышмый. Гарипов төзүчеләргә сыйфатлы ремонт һәм уңышлы дизайн өчен рәхмәт белдерде, проектта республика белгечләре эшләвен искәртте.
Гарипов белән бергә мәктәпне Татарстан вице-премьеры Фәнил Әһлиуллин, «Бердәм Россия» партиясенең төбәк башкарма комитеты җитәкчесе Марат Сәмигуллин, Дәүләт Советы депутаты Нәҗип Хаҗипов, Бердәм Россия Яшь Гвардиясенең Татарстан бүлеге активистлары һәм делегациянең башка вәкилләре карады.
Хәзерге вакытта объектта баскыч терәкләрен һәм козырекларны монтажлау эшләре төгәлләнеп килә. Параллель рәвештә спорт залында көрәш сәнгате белән шөгыльләнү өчен идәнгә махсус материал җәяләр. Эшләр тәмамлангач һәм залларны спорт инвентаре белән җиһазлаганнан соң, бу секцияләрне яңарту күздә тотыла.
Шулай ук интерактив такталар өчен яктырткыч җиһазлар урнаштыру дәвам итә. Якын арада мәктәп тулысынча яңартылган һәм заманча киңлектә укучылар өчен ишекләрен ачсын өчен барлык эшләр дә кыска срокларда алып барыла.
Мәктәпләрне ремонтлау «Яшьләр һәм балалар» илкүләм проекты максатларына туры килә.