13 кандидатны Татарстанда муниципаль сайлауларга теркәүдән баш тарттылар
13 кандидатны Татарстанда муниципаль сайлауларга теркәүдән баш тарттылар. Бу хакта ТР Үзәк сайлау комиссиясе рәисе Андрей Кондратьев «Сайлау ноктасы» иҗтимагый киңлегендә узган брифингта хәбәр итте.
«Әлбәттә, без теркәүдән баш тарткан кандидатлар бар. Урыннардагы участок сайлау комиссияләре баш тарта, алар шулай ук һәр гаризаны, һәр теркәлүне карый. Һәм менә 13 кандидатны безнең участок сайлау комиссияләре кире какты», - диде Кондратьев.
Кандидатларны кире кагу сәбәпләре төрле. Мисал өчен, тәкъдим итүне хуплаган имзаларда кимчелекләр булырга мөмкин. Кайбер кандидатлар кирәкле документларны бирмәгән. Пассив сайлау хокукы булмаган кандидатлар да булган, чөнки алар чит дәүләт гражданнары булып тора. Үзләрен үзләре теркәүдән төшергән кандидатлар бар.
«Азнакайда бер кандидат берьюлы 18 округта гариза биргән. Әлбәттә, без 18 округта сайлауларда катнашу мөмкин түгеллеген аңлыйбыз. 17 округта ул төрле округларда гариза биргән өчен кире кагылды. Бер округта үзенең хөкем ителүен яшергән өчен кире кагылды», - дип аңлатты Кондратьев.
Муниципаль сайлауларда барлыгы 11 424 кандидат 7531 мандатка гариза биргән. Бу «Бердәм Россия», «Яңа кешеләр», ЛДПР, КПРФ, «Гадел Россия», «Россия коммунистлары», Россия пенсионерларының «Социаль гаделлек өчен» партияләреннән кандидатлар. 2,5 мең кандидат – үз-үзләрен тәкъдим итүчеләр.
«Тагын бер кат ассызыклыйм, теркәүдән баш тарткан 13 кандидат – бу минималь сан. Теркәүдән баш тартулар бу очракта сайлау комиссияләре тарафыннан тулысынча нигезләнгән», - дип йомгаклады Кондратьев.
Бердәм тавыш бирү көне 14 сентябрьгә билгеләнгән. Республиканың барлык территориясендә сайлау участоклары 7.00 сәгатьтән 20.00 сәгатькә кадәр ачык була.
Татарстанда Бердәм тавыш бирү көнендә, 14 сентябрьдә, ТР Рәисен, 7,5 меңнән артык муниципаль депутатны сайлаулар һәм 18 нче Мәләкәс бер мандатлы сайлау округы буенча ТР Дәүләт Советы депутатын өстәмә сайлаулар узачак.
Республика Үзәк сайлау комиссиясе Татарстан Рәисе Рөстәм Миңнехановны («Бердәм Россия»), Руслан Йосыповны (ЛДПР), Виталий Смирновны (Россия пенсионерларының «Социаль гаделлек өчен» партиясе) һәм Хафиз Миргалимовны (КПРФ) сайлауларда кандидат итеп теркәде.