Индонезияда бепул мактаб овқатидан оммавий заҳарланиш содир бўлди

Индонезиянинг Марказий Ява вилоятида жойлашган Сраген шаҳрида кеча, 14 август куни, мамлакат миқёсида катта шов-шувга сабаб бўлган саломатлик ҳодисаси қайд этилди. Президент Прабово Субианто ташаббуси билан амалга оширилаётган бепул мактаб тушлиги дастури доирасида овқатланган 360 дан ортиқ ўқувчи ва фуқаро заҳарланиш аломатлари билан шифохонага ётқизилди. Бу ҳақда “Independent” нашри хабар тарқатди.

Шоҳидларнинг айтишича, мактаб ўқувчиларидан бири кечаси кучли қорин оғриғи, бош оғриғи ва диарея билан уйғонган. У ижтимоий тармоқларда синфдошларининг ҳам худди шундай шикоятлар қилганини кўргач, сабабнинг овқатдан заҳарланиш эканини тушунган. Мутасаддилар таъкидлашича, бу бепул овқат дастури йўлга қўйилганидан бери қайд этилган энг йирик оммавий заҳарланиш ҳолати ҳисобланади.

Марказий Ява вилояти Сигит номли масъул шахси журналистларга берган изоҳида:
— Лаборатория таҳлил натижалари чиқмагунча, ушбу ошхонадан овқат тарқатишни вақтинча тўхтатишни сўрадик, — деди.

Миллий овқатланиш агентлиги раҳбари Дадан Ҳиндаяна эса, аввалги айрим заҳарланиш ҳодисаларидан сўнг ошхоналар фаолияти ва озиқ-овқат етказиб бериш жараёнларига қўйиладиган санитария стандартлари кучайтирилганини таъкидлади.

Бепул мактаб тушлиги дастури Прабовонинг сайловолди кoмпаниясидаги асосий ваъдаларидан бири эди. Кўп миллиард долларлик бу ташаббус мамлакат аҳолиси турмуш сифати ошиши ва иқтисодий ўсишга ижобий туртки беришини мақсад қилган. Президентнинг сўзларига кўра, бундай дастурлар ёш авлод саломатлигига инвестиция бўлиб, уларнинг келажакдаги билим олиш ва ривожланиш имкониятларини кучайтиради.

Ҳозирда ҳолат юзасидан суриштирув ишлари олиб борилмоқда. Мутассаддилар аҳолига расмий маълумотлар ва тавсиялар чиққанигача эҳтиёт чораларига риоя қилишни тавсия этмоқда. Бу эса, аввало, мактабларда озиқ-овқат хавфсизлиги масаласи янада қатъий назоратга олинишини англатади.