Рязань өлкәсендә 18 август матәм көне дип игълан ителде
Дүшәмбе, 18 август, 11 кеше һәлак булган Шилов районындагы предприятиедә шартлаудан соң Рязань өлкәсендә матәм көне дип игълан ителде. Бу хакта төбәк башлыгы Павел Малков хәбәр итте.
Исегезгә төшерәбез, Рязань өлкәсендә заводтагы шартлаудан соң 11 кеше һәлак булган, тагын 130 зыян күрүчегә медицина ярдәме күрсәтелгән.
Коткаручылар кул белән һәм авыр техника ярдәмендә өемнәрне, плитәләрне сүтәләр, төзелеш чүп-чарларын чыгаралар.
Кичә Рязань өлкәсенең Шилов районындагы «Эластик» заводында дары шартлады. Детонация вакытында цех тулысынча җимерелгән.