Боғча боласи бор оилаларга хар ой 618 минг сўм ёрдам пули

Оилада боғчага борадиган кичик фарзандингиз борми?

У ҳолда давлатдан доимий моддий қўллаб-қувватлаш олиш имконияти мавжуд. 2025 йил 31 июлда қабул қилинган ҳукумат қарорига кўра, иқтисодий жиҳатдан қийналаётган оилаларга махсус ёрдам пули ажратилади. Бу ҳақда ҳукумат расмий ҳужжатларида қайд этилган.

Мазкур қонун асосида моддий ёрдам ҳар ойда белгиланган тартибда 618 минг сўм миқдорида тўлаб берилади. Бироқ ушбу имкониятдан фойдаланиш учун муайян шартлар мавжуд. Оила албатта Камбағаллар реестрида рўйхатга олинган бўлиши лозим. Шу билан бирга, фарзанднинг ота ёки онасидан фақат бири бор оилаларгина мазкур дастурда иштирок этиши мумкин. Масалан, бола фақат онаси билан яшаса, ана шу тоифага киради.

Шартлардан яна бири — ягона ота ёки она расман ишга жойлашган бўлиши керак. Бу дегани, иш жойи ҳақидаги маълумот расмий ҳужжатларда қайд этилган бўлиши шарт. Бу талаб давлат томонидан ажратиладиган ёрдамнинг адолатли ва манзилли тақсимланишини таъминлаш учун жорий этилган.

Бундан ташқари, фарзанд мактабгача таълим муассасасига — яъни боғчага мунтазам қатнаши шарт. Ёрдам пули бола тарбияси учун бевосита сарфланишини таъминлаш мақсад қилинган. Шунингдек, ёрдам фақат уч ёшга тўлмаган болаларга берилади. Агар фарзандлар эгизак бўлса, давлат ҳар иккиси учун ҳам маблағ ажратади.

Агар барча талаблар бажарилган бўлса, оила аъзолари ҳар ойда 618 000 сўмдан моддий ёрдамга эга бўлади. Бу эса камбағал оилаларнинг турмуш даражасини маълум даражада енгиллаштиради ва фарзандлар тарбияси учун қўшимча имконият яратади.

Моддий ёрдамни олиш учун ариза бериш жараёни ҳам қулай йўлга қўйилган. Фуқаролар электрон тарзда my.gov.uz портали орқали мурожаат қилиши мумкин. Шунингдек, “Инсон” марказига шахсан бориб, қоғозда ариза топшириш имконияти ҳам мавжуд. Бу орқали ҳар бир оила ўз шароитига мос равишда мурожаат йўлини танлай олади.