Астана - Петропавл тасжолында жол апатынан 2 адам қаза тауып, төртеуі жарақат алды
Астана - Петропавл тасжолында Kia K5 және Volkswagen Passat маркалы екі жеңіл көлік соқтығысып, екі адам қаза тапты, тағы төртеуі жарақат алды, - деп хабарлайды Tengrinews.kz тілшісі.
Бұл туралы Ақмола облыстық полиция департаментінің баспасөз қызметі өкілдері 16 тамызда мәлімдеді.
Жол апаты Көкшетау мен Щучинск қалаларының арасындағы автожолдың 277-шақырымында болған.
"Volkswagen Passat көлігінің жүргізушісі мен бір жолаушысы оқиға орнында көз жұмды. Ал Kia K5 жүргізушісі мен үш жолаушысы түрлі жарақаттармен медициналық мекемеге жеткізілді", - делінген ресми хабарламада.
Қазір бұл дерек бойынша соталды тергеу жүргізіліп жатыр. Нәтижесінде процестік шешім қабылданатын болады.
Ведомство мұндай қайғылы жағдайларды болдырмау үшін жүргізушілерге жылдамдық режимін сақтау қажетін, әсіресе көлік көп жүретін учаскелерде абай болуды, сондай-ақ автокөліктің техникалық жағдайын қадағалау керегін еске салды.
Айта кетейік, 15 тамызда шамамен сағат 14:00-де Ақтөбе облысы, Әйтекеби ауданына қарасты Белқопа ауылының маңында да жол апаты болып, төрт адам қаза тауып, тағы үшеуі жарақат алған еді. Алдын ала деректер бойынша, Toyota Alphard көлігі қарсы жолаққа шығып кетіп, Volvo жүк көлігімен соқтығысқан.
Сілтемесіз жаңалық оқисыз ба? Онда Telegram желісінде парақшамызға тіркеліңіз!