Нигерияда масжидга уюштирилган ҳужумда 50 киши ҳалок бўлди
Нигерияда яна бир даҳшатли фожиа содир бўлди. Шимолий-ғарбий ҳудуддаги Кацинa штатига қарашли Малумфаши туманида жойлашган Унгуван-Мантау шаҳрида қуролли гуруҳ томонидан амалга оширилган ҳужум бутун мамлакат аҳолисини ларзага солди. Маҳаллий маълумотларга кўра, 19 август куни бомдод намози вақтида масжидга бостириб кирган жангарилар тинч аҳолига қарата ўқ узиб, кўплаб одамларни ҳалокатга учратди.
Reuters агентлиги ва media.az нашри тарқатган хабарларга кўра, ҳодиса оқибатида камида 50 киши ҳалок бўлган. Шунингдек, 60 нафар фуқаро жангарилар томонидан зўрлаб олиб кетилгани маълум қилинган. Бу эса воқеанинг нафақат трагедия, балки маҳаллий аҳоли учун янги катта хавф ва изтироб манбаи бўлганини кўрсатмоқда.
Гувоҳлар таърифича, қуролланган шахслар мотоциклларда етиб келиб, масжид ичидаги одамларга қарата ўқ узган. Кейин эса қишлоқ кўчалари бўйлаб ҳаракатланиб, яна тинч аҳолига ҳужум қилган. Ҳатто улар бир нечта уйларни ҳам ёқиб юборишга улгурган. Бу ҳолат қишлоқ аҳолисининг ҳаёти ва мулки бутунлай хавф остида қолганини яна бир бор кўрсатди.
Кацинa штати полицияси вакили Абубакар Содиқ Алию журналистларга маълум қилишича, хавфсизлик кучлари айрим жангариларни қўлга олишга муваффақ бўлган. Шунингдек, улар томонидан икки қишлоққа режалаштирилган янги ҳужумларнинг олди олингани таъкидланди. Бироқ қочиб қутилган жангарилар Мантау ҳудуди орқали яна аҳолини нишонга олиб, одамларнинг ҳаётига хавф солган.
Мутахассислар таъкидлашича, сўнгги йилларда Нигериянинг шимолий-ғарбий ҳудудларида қонунсиз қуролли тузилмалар ва жиноий гуруҳлар фаолияти кескин кучайган. Улар қишлоқларга ҳужум қилиб, аҳоли ва фермерларни товон тўлашга мажбур қилади, йўловчиларни йўлларда тўхтатиб ўғирлайди ҳамда пул эвазига қайтариб бериш билан шуғулланади.
Шубҳасиз, Унгуван-Мантауда содир бўлган мазкур қонли воқеа мамлакат хавфсизлиги учун жиддий синов ҳисобланади. Маҳаллий аҳоли эса ҳукумат ва хавфсизлик кучларидан қатъий чоралар кўриб, тинчлик ва барқарорликни таъминлашни талаб қилмоқда.