Афғонистондаги зилзиладан сўнг қидирув-қутқарув ишлари тугади
Афғонистон ҳукумати 31 август куни юз берган кучли ва катта зилзиладан сўнг қидирув-қутқарув ишларини расман якунлади. Бу ҳақда Кунар вилояти губернатори Қудратуллоҳ Абу Ҳамза Al Jazeera телеканалига маълум қилди.
Губернаторнинг сўзларига кўра, зилзиладан кейин омон қолганларни излаш ва қутқариш ишлари тўлиқ тугатилган. Ҳодиса натижасида ҳалок бўлганлар сони 2204 кишига етди, деярли 4000 киши турли даражада жароҳат олди.
Зилзила эпицентри жойлашган ҳудуд раҳбари ҳукуматнинг жабрланган аҳоли ва кўчирилганларни вақтинча жойлаштириш учун чодирлар етишмаслиги билан жиддий танқисликка дуч келаётганини ҳам таъкидлади. Шу билан бирга, қутқарувчилар ва маҳаллий аҳоли зарур ёрдамни кўрсатиш учун катта саъй-ҳаракат қилиб, ҳаёт учун хавфли шароитларда омон қолганларни излаб топишди.
Мутахассислар ва халқаро ташкилотларнинг фикрига кўра, Афғонистондаги мазкур зилзиладан кейинги зарарларни баҳолаш ва жабрланганларнинг эҳтиёжларини қоплаш ишлари узоқ вақт талаб қилиши мумкин. Ҳукумат ва халқаро ташкилотлар ҳамкорликда жабрланганларга тиббий ёрдам, озиқ-овқат ва бошпаналарни таъминлашда давом этмоқда.