Тошкентда арзон ярмаркаларда назорат кучайтирилиши бошланди
Пойтахт бозорларида ташкил этилган арзонлаштирилган ярмаркаларда нарх-навонинг ҳақиқатда шаффоф ва адолатли бўлиши бўйича қўшимча чоралар кўрилмоқда. Бу ҳақида Тошкент шаҳар ҳокимлиги матбуот хизмати маълум қилди.
Маълумотга кўра, ҳокимлик ва Иқтисодий жиноятларга қарши курашиш департаменти ташаббуси билан аҳолига қулайлик яратиш, турли истеъмол маҳсулотларини арзон нархларда таклиф этиш мақсадида махсус савдо ярмаркалари йўлга қўйилганди. Бироқ сўнгги кунларда ижтимоий тармоқларда айрим расталарда расмий белгиланган нархдан юқорироқ баҳоларда савдо қилингани ҳақида шикоятлар пайдо бўлди. Бу ҳолат эса фуқароларнинг норозилигига сабаб бўлди.
Шу муносабат билан мутасаддилар томонидан нархларни сунъий равишда оширишнинг олдини олиш ва шаффофликни таъминлашга қаратилган қўшимча чоралар ишга туширилди. Хусусан, арзонлаштирилган маҳсулотлар сотиладиган расталарда кузатув камералари ўрнатиш ишлари бошланди.
Ҳокимлик маълумотига кўра, ҳозиргача Миробод деҳқон бозори ҳамда “Эски Жува” (Чорсу) бозорида кузатув камералари ўрнатиб бўлинди. Тез орада пойтахтнинг бошқа йирик бозорларида ҳам шундай техник назорат тизими йўлга қўйилиши режалаштирилган.
Мутасаддилар таъкидлашича, бу чоралар орқали аҳоли ҳақиқий арзонлаштирилган маҳсулотлардан баҳраманд бўлиши ва савдо жараёнида адолат ва шаффофлик таъминланиши кўзда тутилмоқда.