Ангрендаги йўл фожиасида 7 киши ҳаётдан кўз юмди
7 сентябрь куни Ангрен шаҳри ҳудудидан ўтувчи А-373 “Тошкент–Ўш” халқаро автомобиль йўлида кўп машина иштирокида йўл-транспорт ҳодисаси юз берди. Ички ишлар вазирлиги маълумотича, кучли тўқнашув оқибатида етти нафар фуқаро воқеа жойида ҳалок бўлди.
Маълум бўлишича, 1981 йилда туғилган ҳайдовчи А.Р. бошқарувидаги цемент ташувчи Shacman юк автомашинаси (2020 йилда ишлаб чиқарилган, ҳайдовчининг 15 йиллик тажрибаси бор) йўлда бошқарувни йўқотган. Натижада транспорт воситаси темирйўл кесишмасида тўхтаб турган иккита юк машинаси ва бешта енгил автомобил билан қатъий тўқнашган.
Тўқнашув оқибатида кучли ёнғин келиб чиққан. Аммо ҳодиса жойига етиб келган махсус хизматлар ҳаракатлари орқали ёнғин қисқа вақт ичида бартараф этилган.
Расмий маълумотларга кўра, етти киши воқеа жойида жон таслим қилган, беш нафар фуқаро оғир тан жароҳатлари билан шифохонага олиб кетилган. Шунингдек, яна тўрт кишига тиббий ёрдам кўрсатилиб, улар уйларига жавоб берилган.
Вазиятнинг жиддийлиги сабаб, ҳукумат комиссияси тузилди. Унга Бош вазир ўринбосари Очилбой Раматов раҳбарлик қилмоқда. Комиссия жабрланувчилар ва уларнинг оилаларига зарур ёрдам кўрсатиш, шунингдек, фожиага олиб келган шарт-шароитларга ҳуқуқий баҳо бериш билан шуғулланмоқда.
Мутасаддилар таъкидлашича, бу каби ҳолатлар йўлда энг кичик эҳтиётсизлик ҳам қанчалик оғир оқибатларга олиб келиши мумкинлигини яна бир бор эслатади. Ҳозирча воқеа тафсилотлари ўрганилмоқда.