Соболенко US Open'ни кетма-кет иккинчи марта ютди
Арина Соболенко Серена Уилямсдан кейин АҚШ очиқ чемпионатида яккалик баҳсларида ғолибликни ҳимоя қилган биринчи теннисчи бўлди, деб хабар беради Opta Ace.
Беларуслик спортчи финалда америкалик Аманда Анисимовани 6:3, 7:6 ҳисобида мағлуб этиб, 1 соат 35 дақиқа давом этган баҳсни ўз фойдасига якунлади.
Ушбу ғалаба Соболенконинг фаолиятидаги 21-WТА соврини бўлди. Шунингдек, у “Катта дубулға” мусобақаларида тўртинчи чемпионликни қўлга киритди: икки марта US Open ва икки марта Австралия Open мусобақаларида зафар қучган. Жорий йилда эса беларуслик теннисчи тўрт унвон билан йилни якунламоқда.
“Жамоамга миннатдорлик билдираман. Мен учун бу йил осон кечмади. Айрим ютқазилган финалларда сизларга қаттиқ муносабатда бўлганимни биламан. Шунга қарамай, ёнимда бўлганингиз учун раҳмат. Мен сизларни оиламдек яхши кўраман. Ва мени доимо қўллаб-қувватлайдиган йигитимга ҳам алоҳида ташаккур,” — деди Соболенко.