Азиза Зокирова рақибини техник нокаут билан мағлуб этди
Маълумки, Англиянинг Ливерпуль шаҳрида World Boxing ташкилоти раҳнамолигида катталар ўртасида илк бор жаҳон чемпионати ташкил этилмоқда. Ушбу нуфузли мусобақада ҳамюртимиз рингга чиқиб, мухлисларни қувонтирди.
-70 кг вазнда ўтказилган беллашувда боксчимиз Азиза Зокирова Венгрия вакили Регина Лакосга қарши кураш олиб борди. Қатъият ва устунлик билан ўтган жангнинг учинчи раундида спортчимиз рақибини техник нокаутга учратиб, ишончли ғалабани қўлга киритди.
Шу тариқа, ҳамюртимиз чорак финалга йўл олди ва 9 сентябрь куни кейинги босқичда рингга кўтарилиши белгиланган. Бу ҳақда Ўзбекистон бокс федерацияси расман маълум қилди.
Эслатиб ўтиш керак, олдимизда яна бир муҳим беллашув бор. Асадхўжа Мўйдинхўжаев хитойлик рақиб Жианхао Жу билан куч синашади. Ушбу тўқнашув ҳам катта қизиқиш билан кутилмоқда.
Ўзбек боксчилари Ливерпулда давом этаётган жаҳон чемпионатида нафақат юртимиз шарафини, балки ўзларининг куч ва маҳоратларини намойиш этмоқда. Бу ғалаба эса ҳамюртимизнинг кейинги босқичларда ҳам юқори марраларни кўзлаётганидан дарак бермоқда.