Али Алиев 0:6 ҳисобидаги мағлубиятдан сўнг истеъфо сўрамоқчи
Жаҳон чемпионати–2026 саралаш учрашувларида Қозоғистон терма жамоаси навбатдаги йирик мағлубиятни қайд этди. Сафарда Белгияга қарши кечган баҳсда қозоғистонликлар 0:6 ҳисобида майдонни тарк этишди. Бу натижа кетма-кет тўртинчи мағлубият бўлиб, сўнгги тўрт ўйинда умумий ҳисоб 1:12 ни ташкил этди.
Учрашувдан кейин Қозоғистон миллий терма жамоаси бош мураббийи Али Алиев журналистлар билан мулоқотда барча айбни ўз зиммасига олди.
– Қисқача айтаман. Бугунги натижа учун тўлиқ масъулият менинг елкамда. Ҳеч бир футболчини айбдор қилмайман, чунки улар майдонда қўлидан келган барча ҳаракатни қилишди. Бу – менинг хатоларим. Шу сабабли ариза ёзиб, истеъфога чиқиш ниятим бор. Юртимизга қайтгач, президент ва Қозоғистон футбол федерацияси раҳбариятини бу қарорим ҳақида хабардор қиламан, – деди Алиев.
Мавсум бошидан бери турли танқидларга дуч келаётган мураббийнинг бу сўзлари футбол жамоатчилиги орасида катта қизиқиш уйғотди. Чунки терма жамоа 5 та ўйинда атиги 3 очко жамғариб, J гуруҳида 4-ўринни эгаллаб турибди.
Мутасаддилар ва мухлислар Али Алиевнинг қарорини қандай қабул қилиши, ҳамда унинг ўрнига ким тайинланиши ҳозирча номаълум. Бир нарса аниқ – Қозоғистон термаси олдидаги саралаш баҳсларида вазиятни яхшилаш учун жиддий чоралар кўрилиши зарур.
Шу боис, терма жамоа атрофидаги бу вазият яқин кунларда ҳам кенг муҳокама этилиши табиий.