Талғардағы жантүршігерлік қылмыс: екі жасар қыз анасымен ауруханада жатыр
Бала құқықтары жөніндегі уәкіл Динара Зәкиева мен Алматы облысының әкімі Марат Сұлтанғазиев демалыс күндері Талғарда ұрланған екі жасар қыздың жағдайы туралы айтып берді, - деп хабарлайды Tengrinews.kz тілшісі.
Динара Зәкиеваның айтуынша, қазір сұмдық оқиғаны бастан өткерген қыз анасымен бірге ауруханада жатыр.
"Олармен психологтар жұмыс істеп жатыр", – деп қосты Қазақстандағы Бала құқықтары жөніндегі уәкіл.
Резонанс тудырған қылмысқа қатысты Алматы облысының әкімі Марат Сұлтанғазиев те пікір білдірді.
"Тергеу жүріп жатыр. Бала анасымен бірге, жағдайы қалыпты", – деді ол журналистерге.
Талғардағы адам өлтіру және бала ұрлау оқиғасы
Еске салайық, 6 қыркүйекте Талғар маңындағы Қызылқайрат ауылында жұртты дүр сілкіндірген қылмыс болды. Ер адам ауыл тұрғынын атып өлтіріп, оның кішкентай жиенін ұрлап кеткен. Кейінірек арнайы жасақ баланы құтқарып, анасымен қауыштырды. Күдікті ұсталды.
Сәриева оқиғаға қатысты бірнеше видео жариялап, кейбір деректерді нақтылады.
Видеода жәбірленуші Сәриеваның туған әпкесі екені, ал күдікті автосервис қызметкері екені айтылады. Бір ай бұрын ол әйелді зорлады деп айыпталған. Адвокаттың сөзінше, сол кезде полиция ешқандай шара қолдамаған. Екі күн бұрын адвокат күйеуімен бірге күдіктіні ұстап, полицияға тапсырған, алайда келесі күні ол босатылған. Осыдан кейін ер адам Сәриеваның әпкесіне қоңырау шалып, қорқыта бастаған. Кейін ол әйелдің ағасының үйіне барып, оны атып өлтіріп, екі жасар баланы ұрлап әкеткен.
Сілтемесіз жаңалық оқисыз ба? Онда Telegram желісінде парақшамызға тіркеліңіз!