«Горкоммунхоз» предприятиесе вәкиле: Чаллыда бакчачылар бик күп
Казан агросәнәгать паркында узган Республикакүләм Бакчачы көнендә Чаллы вәкилләре дә катнашты. Биредә алар бакча уңышын күрсәткән күргәзмә, фотозона һәм импровизацион трамвай белән тукталыш ясаганнар иде. «Горкоммунхоз» предприятиесе генераль директоры урынбасары Лилия Галиева экспозиция хакында «Татар-информ» хәбәрчесенә тулырак сөйләп үтте.
Чаллы шәһәре быел Казан халкын үзенчәлекле трамвай белән шаккатырырга булды. Безнең трамвайның яртысы – Советлар Союзы дәвере стилендә. Ә инде икенче ягы – хәзерге көндәге трамвай. Менә шундый вакыт машинасыдай килеп чыкты ул безнең. Трамвай импровизацион рәвештә ике бакчага илтә. Бакчаның тукталышы «Бәхет тукталышы» дип атала. Композициядә 2 тутый кошны да күрәбез – алар шәһәргә, республикага канатларында бары тик яхшы хәбәрләр китерә, дип фикерлибез. Аннары бакчабыз – ике якка бүленгән: берсе аның яшелчәләр зонасы, икенчесе – авыл зонасы. Янында кукуруз басуын да ясап куйдык. Безнең Чаллыда бакчачылар бик күп», – диде ул.
Чаллының мәдәният хезмәткәрләре, шул исәптән «Энергетик» мәдәният сарае артистлары булган игезәк Алинә һәм Динә Гарифуллиналар җыр башкарды.
Чара Тинчурин театрының оркестры чыгышы белән башланган иде. Бәйрәм кунаклары өчен коры чәчәкләрдән китап кыстыргычлары, балавыздан шәмнәр һәм шкатулкалар ясау, кашпо бизәү һәм агач кисәкләренә рәсем төшерү буенча төрле мастер-класслар оештырылды. Күңел ачу программасы кысаларында Татарстан Республикасының атказанган артисты Фирдүс Тямаев, мультиинструменталист артист Фәнзил Шәрифуллин, «Аккордеон Старс» дуэты һәм Бөтенроссия һәм халыкара конкурслар лауреатлары, «Юки» вокаль триосы һәм башкалар чыгыш ясады.