Тимур Кападзе Эрон терма жамоаси таслим этилган ўйин ҳақида нималар деди?
- Аввало, ҳаммани ғалаба билан табриклайман! Қийин учрашув бўлди. Осон бо;лмаслигини билгандик, чунки ҳеч ким ютқазгиси келмаслиги аниқ эди.
- Бугунги ўйин ҳақиқатан асабий ўтди. Ҳакамлик масаласида нима дея оласиз? Эронликлар жуда норози...
- Эрон терма жамоаси қачон рози бўлган ўзи? Ҳар доим шунақа бўлган. Бу уларга хос нарса. Билмадим, эпизодларни кўрмадим. ВАР кўриб чиқиб, қарор қабул қилди. Кечирасизлар-у, Эронда ҳам бундай ҳолатлар кўп кузатилган. Энг асосийси, ғалаба қозонишни уддаладик.
- Элдор Шомуродов астойдил ҳаракат қиляпти, лекин ўхшамаяпти...
- У яхши ҳолатда эди. Кайфияти ҳам, ўйинга ёндашуви ҳам жойида эди. Турнирга жиддий ёндашгандик. Элдорда тажриба бор, у ёш футболчи эмас. Ундан янада кўпроғини кутишлари табиий ҳолат.
- Биринчи таймда Элдор Шомуродов ҳаракат қилаётганида ҳаволатиб тўп узатишлар кўп бўлди, иккинчи таймда Игор Сергеев захирадан тушгач, ўйинда паслар асосан ердан берила бошлади... Бу ҳақда нима дея оласиз?
- Турлича ўйин қилиш керак эди, пастдан ҳам, ҳаводан ҳам. Иккинчи бўлим бошида кўп хато қилдик. Эрон ҳам хатоларимиздан унумли фойдаланди. Менимча, уларни кутиб олиш зарур эди. Кейин кўрсатма бердим ва экстра таймларда бошқача ўйнашга уриндик.
- Бундан олдинги саволни бироз тўлдирган ҳолатда айтмоқчиманки, иккинчи бўлимда майдонда бўйдор футболчилар кўп эди. Иккинчи қаватдаги курашларда асосан Аббос фаоллик кўрсатмоқда. Бу қандайдир яширин режамиди ёки тасодиф?
- Албатта, Аббос Файзуллаев ҳужумда ўйнагани учун шундай бўлди. Унинг бўйи пастлигидан келиб чиқиб ҳимоячилар унга кўп эътибор қаратмагандир. Менимча, энг асосийси, ғалаба қозонганимиздир.
- Турнир давомида ҳар доим ротацияга қўл урдингиз. Ўткир Юсупов жароҳат олганида Владимир Назаровга имкон бердингиз. У баҳсга Эргашевдан кўра яхшироқ тайёрмиди?
- Албатта, буни дарвозабонлар мураббийи билан маслаҳатлашган ҳолда амалга оширдик. Шунинг учун қўрқмасдан уни майдонга туширдик. Бу мусобақада кўплаб футболчиларни синаб кўриш имкони бор эди. Ҳамманинг имкониятларини кўриб олдик. Кимдир дебют қилди, кимдир узоқ вақт ўйнамасдан, энди термага қайтди.
- Шифокорларнинг дастлабки хулосасига кўра, Ўткир Юсуповнинг жароҳати қанчалик жиддий?
- Буни МРТдан сўнг билиб оламиз. Шифокорлар ўрганиб чиқса, тез орада ҳаммаси аниқ бўлади.
Манба: championat.asia