Бразилия ЖЧ-2026 саралашида тарихий антирекорд қайд этди
Бразилия терма жамоаси ЖЧ-2026 саралаш босқичини ўзига хос тарзда якунлади. "Селесао" Жанубий Америка минтақавий саралаш босқичида барча 18та баҳсда иштирок этиб, 28 очко жамғарди ва 5-ўрин билан финал босқичига йўлланма олди. Бу кўрсаткич – 10та жамоа иштирок этган олтита саралаш жараёнидаги энг ёмон натижа сифатида тарихда қолди.
Маълумот учун, Бразилия бунга қадар энг паст кўрсаткичини ЖЧ-2002 саралашида қайд этганди. Ўшанда улар 3-ўрин билан мусобақага чиқиб, сўнгра турнир чемпионига айланишган.
Пентакампионлар тўрт марта саралаш босқичларини биринчиликда якунлаган: ЖЧ-2006, ЖЧ-2010, ЖЧ-2018 ва ЖЧ-2022 йилларда улар рақобатчиларини ортда қолдирган. Шу билан бирга, ЖЧ-1998 саралашида амалдаги чемпион сифатида, ЖЧ-2014да эса мезбон сифатида иштирок этмаган.
ЖЧ-2026 саралаш босқичида Бразилия жамоаси бошида икки мураббий – Фернандо Диниз ва Доривал Жуниор билан ҳаракат қилди. Бироқ бу йил май ойида италиялик тажрибали мутахассис Карло Анчелотти жамоа бош мураббийи этиб тайинланди.
Шу тариқа, "селесао" саралашдаги ўзига хос антирекордга қарамай, яна бир бор жаҳон чемпионати финал босқичида майдонга чиқиш имкониятини қўлга киритди. Мухлислар эса энди Карло Анчелотти қўл остидаги янги Бразилия қандай кўриниш олишини кутмоқда.