«Барселона» Хасбуллани реконструкция қилинган «Камп Ноу»га таклиф қилди
Каталониянинг машҳур клуби «Барселона» тез орада янгидан қурилиб, замонавий кўринишга келтирилган «Камп Ноу»да ўзининг дастлабки учрашувини ўтказиши кутилмоқда.
Клуб раҳбариятининг маълум қилишича, «Камп Ноу»да бўлиб ўтадиган икки муҳим беллашув – 28 сентябр куни «Реал Сосьедад» ва 19 октябрда «Жирона»га қарши ўйинларга россиялик таниқли блогер Хасбулла Магомедов таклиф этилган.
«Барселона»нинг бу қадами клубга бўлган қизиқиш ва эътиборни янада оширишга қаратилгани айтилаяпти. Шунингдек, Хасбулладан ташқари катта аудиторияга эга бўлган бошқа машҳур блогерлар ҳам ушбу баҳсларга таклиф қилиниши мумкинлиги тахмин қилинмоқда.
Маълумот учун, «Камп Ноу»нинг очилиши дастлаб 10 август кунига режалаштирилганди. Бироқ қурилиш ва реконструкция ишларининг чўзилиши туфайли стадионнинг расмий очилиш маросими белгиланган муддатдан кечиктирилди.
Шу тариқа, мухлислар нафақат янги кўринишдаги стадионни кўриш, балки машҳур шахсларнинг иштирокига ҳам гувоҳ бўлиш имконига эга бўлишади.