Renault Clio’нинг янги авлоди кўргазма саҳнасида: ёнилғи сарфи 100 кмга 3,9 литр

Франция автомобилсозлик брендининг энг машҳур моделларидан бири ҳисобланган Clio’нинг олтинчи авлоди янгиланган кўринишда Мюнхенда ташкил этилган автосалонда жамоатчиликка тақдим этилди.

Ҳэтчбекнинг ташқи ўлчамлари қуйидагича: узунлиги 4116 миллиметр, эни 1768 миллиметр, баландлиги эса 1451 миллиметр. Ғилдирак базаси 2591 миллиметрга тенг. Беш нафар йўловчига мўлжалланган автомобилнинг юкхона қисми 391 литргача сиғимга эга.

Салон қисми Renault 5 электромобилини эсга солади. Интерьерда икки дона катта сенсорли экран, анъанавий тугмачалар, олд қисмида икки USB-C порти ва симсиз қувватлаш қурилмаси ўрнатилган.

Техника жиҳатдан эса Clio E-Tech гибрид тизими билан таъминланган. Унда 1,8 литр ҳажмга эга атмосферали бензинли мотор ва икки электродвигатель уйғунлашган. Ушбу тизим машинага 8,3 сонияда 100 км/соат тезликка чиқиш имконини беради. Ҳибрид тартибда автомобиль 1000 километр масофани босиб ўта олади, ёнилғи сарфи эса 100 километр йўлга 3,9 литр атрофида қайд этилмоқда.

Шу билан бирга, Clio’нинг 1,2 литрли турбобензинли 115 от кучи қувватига эга версияси ҳам ишлаб чиқилган. Бу модел 100 км/соат тезликка 10,1 сонияда чиқиши мумкин.

Ҳозирча янги Clio’нинг бозор нархи ва расмий савдога чиқиш санаси ҳақида маълумот бериламаган. Аммо ушбу автомобиль ўзининг иқтисодийлиги ва замонавий технологиялари билан кўплаб харидорларни қизиқтириши кутилмоқда.