Юрист анекдотлар өчен җинаять җаваплылыгына тарту куркынычы турында кисәтте

Беренче карашка үпкәләтми торган анекдот җинаять эше кузгату өчен сәбәп булырга мөмкин, дип кисәтте Мәскәү шәһәренең кеше хокуклары буенча вәкаләтле вәкиле каршындагы экспертлар советы вәкиле, юридик фәннәр докторы Людмила Айвар «Абзац» интернет-басмасына биргән интервьюсында.

«Әгәр кеше автобуста сүгенү сүзләрен катнаштырып мәзәк сөйләсә - бу вак хулиганлыкка керә, моның өчен штрафка тартырга яки хәтта 15 тәүлеккә кадәр кулга алырга мөмкиннәр. Әгәр дә анекдот конкрет кешене кимсетсә яки дини хисләренә кагылса, штрафның күләме дә арта, җаваплылык та катгыйлана. Әмма «гаепсез» шаярту җинаять эше белән тәмамланырга мөмкин булган очраклар да бар», – дип искәртте Айвар.

Юрист сүзләренчә, милләткә яки дингә карата нәфрәт уятучы анекдотлар өчен РФ Җинаять кодексының 282 маддәсе буенча җаваплылык билгеләнә. Әгәр мәзәктә террорчыларны акласалар, бу очракта РФ Җинаять кодексының 205.2 маддәсе нигезендә җиде елга кадәр иректән мәхрүм итү каралган.

Айвар мәзәкләрнең эчтәлеген, контекстын һәм бастырып чыгару урынын күзәтергә кирәклеген искәртте. Анекдот кешене мыскыллый торган түгел, ә көлдерә торган булырга тиеш, дип өстәде ул.