«Ювентус» янги мавсум учун узумзор акс этган формасини тақдим этди
«Ювентус» клуби 2025/26 йилги мавсум учун Adidas компанияси томонидан ишлаб чиқилган учинчи форма тўпламини тақдим қилди. Бу сафарги дизайн Пьемонтнинг машҳур узумзорлари ва виночилик анъаналарига асосланган. Ушбу маданий мерос 2014 йилдан ЮНЕСКОнинг бутун жаҳон мероси рўйхатига киритилган бўлиб, унинг қадриятидан клуб илҳом олган.
Янги форма нафис ва замонавий кўринишда ишлаб чиқилган. Қора, бургундия ва тўқ яшил ранглар уйғунлиги, шунингдек, узум тусидан олинган график нақшлар футболкага ўзига хос жозиба бағишлайди. Дизайнда элегантлик билан бирга, замонавийлик ҳам мужассам этилгани айтилмоқда. Бу формани нафақат стадион трибуналарида, балки шаҳар кўчаларида ҳам бемалол кийиш мумкин.
Комплект қора шортлар билан тўлдирилган. Уларда клуб рамзи, логотип ва ўйинчилар рақамларида фил суяги рангидаги жиҳатлар акс этган. Шунингдек, учта тўқ яшил чизиқ ҳам киритилган. Образни «Ювентус» ёзуви туширилган қора гетрлар тўлиқлайди.
Шу тариқа, туринликлар навбатдаги мавсум олдидан мухлисларини янада ажойиб ва маданий руҳдан илҳомланган янги форма билан хурсанд қилишди.