Роналду «Барча замонларнинг энг яхши футболчиси» совринини олди

Португалия терма жамоаси сардори ва Саудиянинг «Ал-Наср» клуби юлдуз ҳужумчиси Криштиану Роналду яна бир нуфузли мукофотга эга чиқди. У Португалия Лигаси томонидан ўтказилган тақдирлаш маросимида «Барча замонларнинг энг яхши футболчиси» совринига муносиб кўрилди.

Маросимда эълон қилинган баёнотда таъкидланишича, 40 ёшли Роналду бутун бошли бир даврни белгилаб берган, жаҳон футболи тарихида ўчмас из қолдирган ва авлодларга илҳом манбаи бўлиб келаётган футболчи сифатида тарихда қолади.

Футболчи маросимда шахсан иштирок этмади, бироқ ташкилотчилар Роналду соврин билан туриб нутқ сўзлаган видеомурожаатини намойиш қилди. У нутқида ўзини қўллаб-қувватлаб келаётган мухлисларига ва терма жамоаси билан клубларида бирга ҳаракат қилган жамоадошларига чуқур миннатдорлик изҳор этди.

Криштиану Роналду — футбол тарихида энг кўп шахсий совринларни қўлга киритган спортчилардан бири. У France Football томонидан бериладиган энг нуфузли индивидуал мукофот — «Олтин тўп»нинг беш карра соҳиби ҳисобланади. Шу билан бирга, у Европа чемпионатлари ва Чемпионлар Лигасида кўп марта ғолиб чиққан, турли мусобақаларда энг яхши тўпурар бўлган.

Энг эътиборли жиҳати шундаки, Роналду футбол тарихида энг кўп гол урган рекордчи сифатида қайд этилган. Унинг шахсий ҳисобида 943 та гол мавжуд. Бу кўрсаткич жаҳон футболида мутлақ рекорд ҳисобланади.