Әлмәттә кабат исерек килеш руль артына утырган ирнең Porsche Cayenne автомобилен алганнар
Әлмәт шәһәр суды элегрәк тә административ җаваплылыкка тартылган һәм кабат исерек хәлдә руль артына утырган 40 яшьлек ир-атны гаепле дип таныган. Бу хакта ТР прокуратурасы матбугат хезмәте хәбәр итә.
Эш материаллары нигезендә, 18 июльдә Porsche Cayenne автомобиле йөртүчесе исерек хәлдә руль артына утырган. Аны юл-патруль хезмәте хезмәткәрләре тоткарлаган. Ир-атка элегрәк тә шундый ук сәбәп аркасында җәза билгеләнгән булган, әмма ул тиешле нәтиҗәләр ясамаган.
Суд ир-атка 250 сәгать мәҗбүри эшләр рәвешендә җәза билгеләгән һәм ике ел ярымга машина белән идарә итү хокукыннан мәхрүм иткән. Porsche Cayenne автомобилен дәүләт кеременә конфискацияләгәннәр.