Татарстан Тарих институты Россиягә хезмәт иткән татарлар темасын өйрәнүен дәвам итә
Бүген Россия галимнәре һәм туган якны өйрәнүчеләр «Россия империясенең иррегуляр формированиеләре составында булган татарлар» бөтенроссия фәнни конференциясендә катнашты. Чара ТР Фәннәр академиясенең Шиһабетдин Мәрҗани исемендәге тарих институтында узды.
Тарихчылар съездын Тарих институты директоры Радик Салихов ачып җибәрде. Татар халкының урта гасырлардан алып яңа чорга кадәр Россиянең барлык хәрби кампанияләренә керткән өлеше гаять зур, дип билгеләп үтте ул.
«Әмма әле күп нәрсәләрне ачыкларга, геройларыбызның, хәрби җитәкчеләребезнең исемнәрен белергә кирәк. Ата-бабаларыбызның хәрби сәнгатен җентекләп өйрәнү мөһим. Иң мөһиме – хәрби хезмәттә булган ата-бабаларыбыз киләчәк буыннарга калдырган кыйммәтләр», – дип белдерде Салихов.
Татарларның Россия хәрби кампанияләрендә катнашуы темасын тарихчы, Башкортстан татар туган якны өйрәнүчеләре җәмгыяте башкарма комитеты рәисе Руслан Мәсәгутов дәвам итте.
«Мәскәү дәүләте чорында ук татарлар Россия дәүләтенең хәрби походларында һәм кампанияләрендә - Ливон сугышында, күчмә халыкларның һөҗүмнәреннән яклауда катнашкан хәрби сословиене тәшкил иткән. «Болганчык еллар»да татарлар Минин һәм Пожарский җитәкчелегендәге ополчениеләр хәрәкәтен формалаштырырга ярдәм иткән һәм хәтта патшаны сайлауда катнашкан», - дип сөйләде Мәсәгутов.
Татарларның Россия дәүләтен үстерүдәге роле тарихи документларда да теркәлгән, дип өстәде туган якны өйрәнүче. «Татарлар үзләрен Россиядән читтә итеп күз алдына китерә алмаган һәм дәүләтебезне дошманнан саклау өчен мөмкин кадәр барысын да эшләгән», – дип йомгаклады ул сүзен.
Чара Ватанны саклаучылар елы кысаларында, шулай ук «Татарлар Ватанга хезмәттә» дәүләт программасын гамәлгә ашыру кысаларында уздырыла. «Татарлар Ватанга хезмәттә» программасы татар халкының Россияне яклауга керткән өлешен өйрәнү өлкәсендәге күпьеллык тикшерүләргә нәтиҗә ясый.
Конференцияне Татарстан Республикасы Фәннәр академиясенең Шиһабетдин Мәрҗани исемендәге тарих институты, Татарстан Республикасы Фәннәр академиясе һәм Башкортстан республикасының Татар туган якны өйрәнүчеләре җәмгыяте оештырган.