11 ёшли бола 14 соатлик дарсдан сўнг касалхонага ётқизилди

Хитойнинг Хунан провинциясида 11 ёшли мактаб ўқувчиси уй вазифаларини ортиқча даражада бажаришга ҳаракат қилиб, саломатлигига жиддий шикаст етказди, деб хабар берди маҳаллий ОАВлар.

Маълум қилинишича, 26 август куни Лян Лян исмли бола эрталаб соат 08:00 дан кечки 22:00 гача узлуксиз дарс тайёрлаш билан шуғулланган. Ўқувчи бир кунда барча ёзги вазифаларини тугатишга уринган. Бир неча соат ўтгач, унда бош айланиши, қўл-оёқларда карахтлик, бош оғриғи ва нафас қисилиши каби белгилари пайдо бўлган.

Ота-онаси уни зудлик билан шифокорга олиб борган. Мутахассислар унга гипервентиляция синдроми ташхисини қўйишган. Ушбу ҳолат ўқувчида танафаффуссиз фикрий ва ҳиссий зўриқиш натижасида юзага келган.

Болага махсус нафас олиш ниқоби тақилган ва қисқа муддат ичида унинг аҳволи барқарорлашган. Шифокорлар бу каби ҳолатлар кўпинча ота-оналар босими, имтиҳонлардан олдинги хавотир, ёки гаджетлардан узоқ вақт фойдаланиш билан боғлиқлигини таъкидлашмоқда.

Гипервентиляция синдроми нафақат нафас олишда қийинчилик, балки мушаклар тортиши, юрак уришининг кучайиши ва ҳатто ҳаёт учун хавфли оқибатларга олиб келиши мумкин.

Август ойи давомида Хунан провинциясида айнан шу белгилари билан тез тиббий ёрдамга 30 дан зиёд бола мурожаат қилгани қайд этилган. Бу кўрсаткич ўтган ойларга нисбатан 10 баробар юқори экани айтилмоқда.