Эрон терма жамоаси Спаллеттини бош мураббийликка таклиф қилиши мумкин
Эрон миллий терма жамоаси 2026 йилги жаҳон чемпионати арафасида бош мураббий масаласини жиддий кўриб чиқмоқда. Турли манбаларга кўра, жамоани тажрибали хорижлик мутахассисга ишониб топшириш эҳтимоли кун тартибида турибди.
Италиянинг Footmercato нашри ёзишича, 66 ёшли машҳур мураббий Лучано Спаллетти Эрон миллий жамоаси бош мураббийи лавозими учун асосий номзодлардан бирига айланиши мумкин. Маълумотларга қараганда, италиялик мутахассиснинг агентлари унинг хизматини Эрон футбол федерациясига расман таклиф этган.
Спаллетти жорий йил июнь ойида Италия миллий терма жамоасини ЖЧ-2026 саралаш босқичида Норвегияга қарши учрашувдаги мағлубиятдан сўнг лавозимини тарк этган эди. Аммо шунга қарамай, тажрибали мураббий яқинда бўлиб ўтадиган жаҳон чемпионатида иштирок этиш ва ўз сўзини айтишни истамоқда.
Эроннинг Tasnim ахборот агентлиги хабар беришича, жамоанинг ҳозирги бош мураббийи Амир Ғаленойи билан йўллар ажралиши мумкин. Сўнгги ўйинларда қайд этилган қониқарсиз натижалар ва майдондаги ўйин сифати оммавий ахборот воситаларида қаттиқ танқид қилинмоқда. Мухлислар ҳам миллий жамоани ЖЧ-2026да тажрибага эга хорижлик мураббий бошқаришини талаб қилмоқда.
Эслатиб ўтамиз, Спаллетти 2023 йилда «Наполи»ни 33 йиллик танаффусдан кейин А Серия чемпионлигига олиб чиққан ва шу орқали катта эътирофга сазовор бўлганди. Шундан сўнг у Италия миллий жамоаси бош мураббийига айланган эди.
Эндиликда эса италиялик мутахассиснинг номи Эрон терма жамоаси билан жиддий равишда боғланмоқда ва яқин кунларда бу масалада муҳим қарорлар қабул қилиниши кутилмоқда.