КҲФ мегӯяд, як сайёҳи русро дар кӯҳҳои Панҷакент наҷот дод
Кумитаи ҳолатҳои фавқулодаи Тоҷикистон аз наҷоти як шаҳрванди Русия дар ағбаи Чимтарға хабар додааст.
Ба иттилои ин ниҳод, Антон Вениаминович ҳангоми саёҳат дар ҳудуди деҳаи Ворӯи Панҷакент аз кӯҳ лағжида, ҷароҳат бардоштааст.
"Ҳангоми санҷиш маълум гардид, ки сайёҳ ҳангоми лағжиш аз баландӣ пойаш шикастааст. Ба ӯ дар ҷойи ҳодиса кӯмаки аввалияи тиббӣ расонида шуд",- афзудааст манбаъ.
Ба иттилои КҲФ, айни ҳол ин шаҳрванди Русия таҳти назорати табибон қарор дорад.
Дар гузашта ҳам шуморе аз сайёҳони хориҷӣ дар минтақаҳои баландкӯҳи Тоҷикистон дармонда, кормандони Кумитаи ҳолатҳои фавқулода онҳоро наҷот дода буданд.