Хориждан келган пул ўтказмалари 12 миллиард доллардан ошиб кетди

Жорий йилнинг январь–август ойларида хориждан Ўзбекистонга йўналтирилган пул ўтказмалари миқдори 12 миллиард АҚШ долларидан ортиқни ташкил этди. Бу кўрсаткич ўтган йилнинг шу даврига нисбатан қарийб 23 фоизга кўпдир. Марказий банк ахборотига кўра, тушумларнинг асосий қисми Россиядан келган бўлса-да, Европа ва АҚШдан йўналтирилган маблағларда ҳам сезиларли ўсиш кузатилмоқда.

Мутасаддиларнинг қайд этишича, йил бошидан буён пул ўтказмалари ҳажми март ойидан бошлаб барқарор ўсиш траекториясига кирган. Хусусан, июль ойида ўтказмалар қарийб 2 миллиард долларга етган бўлса, август ойида ҳам 1,9 миллиард доллардан ошди. Шунга қарамай, ўтган йилнинг август ойига нисбатан жорий йилда 19,9 фоиз ўсиш қайд этилган.

Шу билан бирга, аҳоли валюта операцияларида ҳам ижобий баланс кузатилди. Январь–август давомида фуқаролар сотиб олганига нисбатан 5,6 миллиард долларга кўпроқ хорижий валютани сотишган. Бу кўрсаткич ўтган йилнинг шу даврига нисбатан 40 фоизга ошган бўлиб, ички валюта бозорида талаб ва таклиф мувозанатига ижобий таъсир кўрсатди.

Марказий банк маълумотларига кўра, пул ўтказмаларининг асосий қисми Россиядан йўналтирилган бўлса-да, Европа Иттифоқи мамлакатлари, АҚШ ва Буюк Британиядан ҳам жонланиш кузатилмоқда. Масалан, Болтиқ давлатларидан келган тушумлар 65,6 фоизга, бошқа минтақалардан эса 38,2 фоизга кўпайган.

Европа мамлакатларидан йўналтирилган маблағлар ўтган йилга нисбатан қарийб 26,9 фоизга ошган бўлса, АҚШдан келган пул ўтказмалари 10,3 фоизга ўсган. Россиядан йўналтирилган маблағлар эса 23,7 фоизга ошгани таъкидланди. Шу билан бирга, Осиёдан йўналтирилган маблағлар барқарор даражада қолган.